Nazar

Mr.Paagal ne kabhi kaha tha" mai aksar deewanon ko ghaur se dekha karta hun..kabhi dekha hai unhen ghaur say? kabhi dekha hai unke nazdeek jaa kar? mujhe yaad hai is guftagu ke baad maine jahaan bhi kisi deewana-haal ko dekha un per naza jamaaye rakhi..unki naqal-o-harkat ko ghaur se dekha..ye jo deewane nazar aate hain inhen sab khabar hoti hai..inhen deewana kehne waale deewane hote hain..ye jo hosh se begaane lagte hain inhen utna hi hosh chahiye hota hai ke unke mehbub ki yaad may khud ko jalaaye rakhen...ek Dost ne kisi mehafil may sawaal kiya tha" Batao khuda kahaan pe milta hai ? maine kaha tha khuda tou her tutey huye dil may milta hai..usne muskura ke kaha " khuda tou faqeeron may milta hai, in deewanon may milta hai...waqi maine Rab ka jalwa wahin dekha jahaan aksar kisi ki nazar nahi jaati..vo jisey log perda-e-ghaib kehte hain mahaz aankh ka perda hai..her nazar us perde ko chaak nahi kar paati...jis nazar per nazar-e-inaayet hojaaye phir vo nazar paaleti hai,jahaan siwa uske aur uske rab ke koii aur nahi hota... Deewanon ne bahuton ko deewana banaya hai...in mastanon ne kitnon ko aahon se jilaaya hai...log hijr-o-visaal ke qisse sunaate hain,aahen bharte hain...per ye matwaale dam dam mast qalandar andar hi andar sab ko roshan karte hain..na shauq-e hijraan hai na vasal ka saamaan hai...bas inki duniyavi zindgi mast kharabaan hai...ye mailey kucheley malgaje phatte puraane libaadon may haft-e-aqleem rakhte hain...inke nangey pairon taley qismat jhukti hai...inki bhatakti nazron say wihadaniyet jhalakti hai...ye perwaaney ek umr daraaz maangte hain apne mehbub ke ishq may jal jal jaane ko...soz-o-gudaaz ki luzzaton se laa-perwa bas uski takraar kiye jaate hain....Ye Saraapa ajaz, dil shah-e-do-jahaan, insa ashiq aur koi kahaan, darasal yehi tou hain kibriyaaii ki shaan.. Rab ne bhi apni pehchaan ki raahen wahaan chuni hain jahaan bande ka gumaan na pahunchey..haan jub kisi bande per vo meherbaan hona chahe tab rahbar ko apna zariya bana leta hai, usey apni raahon per bula leta hai...usko apni pehchaan ka patta deta hai..ye us banda-e-khuda ki khush-bakhti hai ke vo deewana na hote huye bhi deewana kehlaata hai...Log deewanon ke qareeb nahi jaate..gar aatey tou samajh bhhi jaate...khuda ne ye perda kyon giraaya hai...ye raaz bandon ki samajh may kub aaya hai...log tou ek dusre se perdey gira ke miltey hain...unse bhala perda-e-qudrat uthey kaise...unki aankhon ko tou bas husn-o-zeenat ki hawas hai..unmay tajaali-e-tuur ki taab kahaan...vo Noor ka nazara-jo aankhon ko karde khaira, inki aankhon se ojhal hi rehta hai...ke Aye bande tujhe tou husn-e-aarzi ki talaash hai...mai tou dayemi hun,mujhe paana hai tou phir khud ko dhona hoga...ghaflaton ke perde hataane honge...mohabbaton may jeena marna hoga...kisi ki khaatir mitna sanwarna hoga...doob doob ke ubharna hoga...ubharne ki shert yon hai , insaan sabuton ka ghulaam hai...Mushahidon ka mohtaaj hai...aane waali nasal ko ye bhi tou bataana hai ke ishq ek aag ka darya hai aur doob ke jaana hai.....

Mahakuum

Maa Baap ko Aulaad unke karmon ka phal ban kar nasib hoti hai.Aksar nekiyaan jo insaan se sarzad hoti hain,unhe yaad bhi nahi rehteen..Aksar khuda ki khushnudi ki khaatir insaan karta hai..Donon suraton may nekion ka Ajar zarur milta hai..Insaanon ki ab kaii qismen maujud hain..warna qadeem insaan tou apni ek hi qisam ka hua karta tha..matlab,bana banaaya ready-made..jisey radd-o-badal ka mafhum bhi na malum tha..uski mussabit soch hi uski rahnuma thi..Ab dil kisi ka hai tou dimaagh kisi ka...yaane ke "mokhtar-e-kul se bekhabri ne usko her kisi ka mahakum kar diya"..yehi vo haqeeqat hai jis se bhaagta raha hai Admi..

Waqt ka safar badi jaldi taye hojaata hai.Aaj aarzu ,kal gunaah,parsun saza...phir barson nadamat..waqt-e-aakhir tauba,istaghfaar...kaash waqt ki ibtida phir se hoti..insaan az-sar-e-nau ghaur-o-fikar ke marhalon se guzarta..apna aghaaz itiba se karta..phir anjaam se be-fikar hota..hmmmm bas yehin se shuru hoti hai hikmat ki pesh-dasti..tujhe niyamaton ka manzar dikha diya,tujhe waqt ka sikandar bana diya,tujhe dil se qalandar bana diya..Ab faisle ki baari insaan ke sar teheri...tujhe kya chahiye kaun chahiye...Tujhe zawaal dekhna hai ke lazawaal hona hai..jis Qadar-Mutlaq ne tujhey apni tamaamtar mohabbaton ka ameen bana kar beheja,tujhe us se kitni mohabbat hai..mohabbat ka wahi daras Awwal,wahi Awwal wahi Aakhir..imtihaan-e-mohabbat tha darmyaan Duniya de kar..

Aaj ka boya hua her beej kal tanawar shajar ban kar kabhi saya-fagan hota hai,kabhi babul ke kaante ban kar lahu lahaan karta hai..zameen tou sakhi hoti hai...insaan ki niyet beej ke saath boii jaati hai..uske hisaab se phal swaad laatey hain...so peshter sanmbhalna behter..abhi bhi waqt hai insaan..sab kuch uska,tu teri ye duniya teri jaan...so kyon na ban jaa tu apne khubsurat qeemti waqt ka mumtaaz-tareen nishaan...kar karam karwa karam..rakh insaan hone ka bharam..ye zindgi niyamat hai nahi hai juram..

Be-Basi Ab Be-Zubaan Nahi Hai

insaani nafsiyaat ke mukhtalif falsafe hain...her philosopher ne apni hi soch ko ranga hai..zaruri nahi ke ye rang her zerooh per chadta ho...kisi dil ki baat sirf wahi dil janta hai..magar kuch dil aise bhi hote hain jo dilon ke bhed paalete hain...bas phir kya...her dil kath-putli ban jaata hai jo unki nazar se guzarta hai..in kath-putlion ke seene may gosht post hi ka bana dil hota hai ,magar usey bhi kaath ka hi samajh liya jaata hai...yaane kaath ka ullu...hota bhi hai...kyonki dil ka sirf ek kaam hai dhadkna...aur mohabbat ki laye per dhadakna..arzu ki ragni per thirakna...khwabon ki chasni per machalna..ye nasha kaafi hojaata hai usey zer karne ko...so zer hoo hi jaata hai....

Be-basi ki kahaani puraani hai...aaj bhi deewanon ki wahi zindgani hai...jo hosh ke naakhun ,hosh ki aankhen rakhte huye bhi aage badhte chale jaate hain ,ye dekhte huye ke khaaii aur kunwaan donon usi ke muntazar hain..shikaari ki pyaas kahan bujhti hai...khoon se aluda nezey dawat-e-shauq hotey hain...aur ye khoon be-rang ,nazron se ojhal hota hai..kyon ki kaath ki putliyaan lahu nahi ro sakteen...unhen tou bas mutahreek karne waale ka shauq pura karna hai..tamaash been ke nazarey ka ehtmaam tou doriyaan thaame haath karte hain...aur bechaare dil ekdin bilkul in kaath ki putliyon ki tarha jazbaat se aari hojaate hain..

jub tak jism jazbaat se aaraasta na ho usme jazibiyet aaye kahaan se...jub tak dil ulfat se pairasta na ho khususiyet paaye kahaan se...jub husn-e-zindgi se aari kardiya jaaye zindgi ko, phir raunaqen lageengi kaise...magar iska bhi intizaam hota hai...hosh gum hua karte they jinke jazbaat se...ab unke hosh gum hain halaath se...unhen sawaalon ki nazar karne waale khud pareshaan hain unke sawaalaath se...ab khud uljhe huye hain apne kamaalath se....kahin aisa na ho ke paala pad jaaye kisi ke mukalaath se...

Be-basi per rona tou sab ko aata hai...magar jo be-bas hone se inkaar karde...khud ko khud se moqable ke liye tayaar karle...phir usey koii dore kahan baandh paati hai..izhaar ko zubaan , arzu-e-bekaraan ki wassaton ko asmaan mil hi jaata hai..raahen mukhtalif sahi, manzil ek hi hai..in raahon ka patta jub khud manzil de de, phir koi tufaan hawaon ko bhatka nahi sakta...koi diya roshan ho kar phir nahi bujhta...uski timtimaati lau ki hifazat khud tufaan karta hai..aise may koi kaath ki putli bhi ji uth-ti hai...

Amma

Sakina per sakta taari hogaya.vo rona chahti thi per ro bhi na saki..kya waqi ye hogaya.,kya waqi…aakhir kyon? Is kyon ki hi tou ijazat nahi hai…ye tou taye-shuda haqeeqat hai..her aaye huye ko laut jaana hai…per waqt ki kisi ko khabar nahi…bulawa kisi bhi waqt aa sakta hai…aise hi tou sadma shakal leta hai..per sakina ke sakun ka aakhiri sahara bhi aaj chin gaya …Aaj waqi vo be-asra hogaii..usey kahaan khabar thi..Maaon ko bhi maut aa sakti hai…vo bhi rukhsat hoti hain …betiyon ki rukhsati ke khwab dekhne waali aankhen abdi nind may doob jaati hain…Aah! Kitna aziyet-naak sach hai ye…dil haathon se dabaaye, aankhon se derd chalkaye bas takey jaarahi thi sab ko…kahin koi lafz uska dilasa na ban saka..saare bahalawe pathra gaye...

Sakina jub paida huii tou itni nhani munni kamzor si ladki thi jiska bachpan dawaon ki nazar hota raha…Amma ne raat din ek kardiye they uski dekhbhal may..Maa kamzor si sakina ko sanbhalte sanbhalte budhi hogayeen aur sakina ko apni jawani ki khabar hi na huii..in beemaar halaath may koi umang jawan hi na hosaki thi…us ke dil ke darwaze jazbaath ke liye kabhi waa ho hi na sake…usne apne behen bhaion ki khabargiri may apni jawani guzar di…ab vo bhi dhalne ko thi..Sakina na khud per taras khana chahti thi na kisi aur ko uska mauqa dena chahti thi…uski saadgi may chupa tha uska hausla…uskey kamzor zaaher ke andar ek mazbut baatin pinhaan tha…ye niyamat thi khuda ki…vo apne be-bas bandon ki tawanaii ban jaata hai…magar walidain in sab se bekhabar apni fikron may ghule jaarahe they…kal jub hum na honge sakina ka kya hoga….unki pareshaan soch qarar na paa saki…her surat may bande ka sirf khuda hota hai..baaqi saare rishte tou waqti hotey hain..abdi lazawaal saathi tou rab ki hi zaat hoti hai…

Ek din Waled faut huye..Ek jawan-saala Bhaii hadise ka shikar hogaya…Amma sadmon se nighaal hogayeen…unke anson ne unki himat chin li…unke sawalon ne unki sochon ne unhen mazeed beemaar kar diya….unki zindgi ka ek wahed sabab thi sakina..bas apni saansen juta juta kar rakhti theen Amma…magar ekdin achanak un saanson se bhi mehroom hogayen…ye unke bas may kub tha ke vo sakina ki khatir apni zindgi apna saath bacha rakhteen…Allah Miyaan ka faisla tha….Sabar ki hadon ko azmaata hua lamha shaakir logon ke nasib may hi hota hai...Amma tut kar bhi bachi raheen..

Sakina ko laga Amma abhi jaag padengi….Abhi awaz dengi…kahin se laut kar aajaayengi….Kaash ye mahaz ek khwab hota…kaash may unke kamzor dil ki dhadkan ban jaati..kaash Amma aankhen khol deteen….magar Amma ye dekhe baghair hi rukhsat hogayeen ke sakina per kya guzri..warna vo kahaan jaa paateen…

Aksar mukhlis log apne derd bhula kar dusron ke derd gale laga liya karte hain..Amma bhi unme se ek theen..unka khubsurat dil her dil may mehfuz hogaya ek yaadgaar ban kar..ab jis jis ke seene may vo mehfuz hogayeen wahaan se wahi ulfat ka chasma phut nikla ….unki mohabbat bazgasht ban gaii…is do pal ki zindgaani may sab faani hai ek mohabbat hi baaqi reh jaani hai…ye paighaam Sakina ne barha suna tha….ab vo Amma ban gaii …

Aye Dil-e-Nadaan

Kahan socha tha ke khamoshi yon goonj uthegi…aur ye goonj door door tak sunaii di..sab hairaan reh gaye…magar ek shaks is gunj may dabi sargoshi sun raha tha…samajh raha tha us mutlaashi ki beqarari ko…waqt ki kami ke sabab uski jaldbazion se serzad hoti nadanion ko rok hi tou na saka…aakhir rok bhi kaise sakta tha..usey ghum-e-dauran may uljha diya gaya tha…ye talaash na jaane kya kya maang rahi thi…Aakhir vo hua jo kaatib-e-taqdeer ne likh diya tha….Baharam ko tutne ki saza mili….yaqeen ko doobne ki saza mili…shauq ko ghum ki saza mili…talab ko firaq ki dua mili…phir bhi carvan-e-dil badhta raha….

Humaira ko sab khwab sa lag raha tha..kya waqi ye hogaya….Aaj uska nikah ek aisi hasti ke saath horaha tha jo her mohabbat karne waale dil ka khwab thi..usey apni khushqismati per naaz tha…Allah ! kya ye sach hai…haan ye sach hai…ye wahi hain jinki tamanna dil ne pehli nazar may ki thi… aur aaj ki is shaadmaani may donon ki dua shaamil thi…

Humaira ek mamuli shakl-o-surat ki munhani si surkh-o-sufed ladki thi..agar usme kuch khaas tha tha uski sachai,uski kamgo tabiyet, uski insaf-pasand fitrat..per usey ajib ghar mila..ajib fitrat ke log miley apnon ki shakal may..jo kaahil they …yehin se her ghalathi ki ibtida hoti hai…bekaar dimagh sust jism kisi ko bhala kya detey…haan zubaan apne hone ka sahi estemal kar rahi thi…aam insani fitrat hamesha dusron may buraian dhundne may waqt guzarti hai per apni khamion per uski nazar nahi jaati….bas in sab ke aadi hogaye they uske kaan..kuch asar tou hona hi tha…jub admi apne mahol may khud ko ajnabi paata hai tab uski tanhaii uski sochon ko hawa dene lagti hai....khayaal baghawat per uksaane lagte hain…inqilab kabhi yon bhi aata hai zindgi may….ke pure kunbey ki zindgi badal kar rakh deta hai…

Ek din Humaira apne gharwalon ke saath safar per thi..wahaan huii thi uski mulaqat sayeed se..usne apni bhaabi se aksar unka zikr sua tha..bhaabi goya sayeed ka payaam hogayen…magar jub pehli baar vo sayeed se mili phir vo is duniya ki nahi rahi…kuch ajib kaifiyet taari huii usper…wapsi ka safar badi khamoshi se kata tha…..

Sayeed ek aalanasb aur nek insaan they..unka silsila khaas tha…magar unki duniyawi zindgi saada thi…jahaan vo khud se zayada dusron ke liye haazir raha kartey….khuda ke bande jub mushkilon may hote hain tou khuda unki madad apne nek bandon ke zariye karta hai…aur un nek bandon ki khususiyet yehi hoti hai ke vo begharz hote hain…vo apna daman saaf rakhtey hain…taaki daman thaamne waalon ke dil saaf hojaayen…ye hidayet ka silsila hota hai..khuda behter karsaaz hai..apne bandon ki falaah ki khatir uski hikmaten zahur pazeer hoti hain..

Uske baad ki gini chuni mulaqaton may najaane kaunse ahad-o-paimaan huye…ke ekdin achanak bilkul filmi andaz may saara haal rubaru rakha usne…gharwalon ko sakta hogaya…bhabi hairaan theen…sayeed jaisi hasti ke liye ladkion ki koi kami nahi thi…per unki pasand Humaira hi kyon? Ache log nek dil ka hi intikhab karte hain..aur is tarha Humaira khaas hogaii..hazar mukhalifaton ke bawajud uske gharwale majbur hogaye…unhen khasta haal sayeed se rishta kahan pasand tha..unhon ne sayed ka baaten hi nahi dekha..uski shaksiyet ko jaana hi nahi…uski haisiyet nahi pehchaani…unhen sayeed ki duniya nazar hi nahi aai…kyonki vo apni duniya dekh rahey they…

Magar sayeed ne mukhalifaton ki perwa nahi ki..apne iradey aur waadey ko efa karne ki khatir bilkul unki duniya ke andaz may apni zindgi ka izhar kiya….

Koi kahaan ghaur-o-fikr ke marahil se guzarna chahta hai..khuda ki khushi ko moqadar samjhe ye tou khaas logon ka khaasa hai…unhon ne sayeed ki bulandion ko pehchana hi nahi…baghair khushi ke ye khushi puri huii…

Ye khubsurat ghadi Humaira ki zindgi ko muatar kar gaii…uske abdi sakun ki ibtidaii marahal kasmakash se guzrey zarur..per sayeed ka saath in sab se balaa-tar tha….

Humaira rukhsat hokar Sayeed ke ghar aagaii…Sayeed shaakir they..Humaira ke liye ye duniya nai thi..ye saada zindgi naii thi…usne zaruraton ko mohabbaton may shaamil kar ke khud ko uljha liya…Aurat jub apne maike se nikal kar sasural chalti hai tab vo ek naya rang apnane ko khud ko tayaar karti hai…mohabbat shauhar ki itni taqatwar hoti hai ke ye kaam uske liye sahal hojaata hai…koii kami giran nahi guzarti…lamhon ka afsos bhi lamhon may zaayel hojaata hai….per Humaira ke saath aisa nahi hua…uski zaruraten shikayeten ban gayeen..uski mohabbat kamzor pad gaii…usne waqi mohabbat samjhi hi nahi…uski nek fitrat ka takhaza kuch aur tha…uski saadadili inki aadi hosakti thi…vo sayeed ki saadgi may chupi niyamaton se anjaan jot hi…

Kaii roz kasmakash may guzarne ke baaad ekdin chupke se apne walidain ke hamraah chali gaii…sayeed ko hairaan chod kar…per sayeed ko apna wada yaad tha…kabhi saath na chodne ka….vo apne wade per qayam rahe…aur Humaira ki wapsi ka intizaar karne lagey….

Khuda ne apne nek bandon ko sada azmaaya…unse judne waali hastion per apna saaya-e-remath banaaye rakha….Ab ye usi ko khabar thi ke kisi dil ko vo kub hidayet bakhshega….kub perde girayega….Sayeed ka intizaar jaari hai..aur Humera ki khamoshi bhi…

Bharam

Aurat hamesha se hi koi na koi bharam ke sahaare umr guzarti aai hai..aaj bhi..kal bhi…aage bhi…uski mohabbaton ko fareb ka sahara jo darkaar hota hai..so diye jaati hai liye jaati hai..khwab aur haqeeqaton ke beech kaii rishton se guzar kar apni hasti hi bhul jaati hai..phir bhi uski ummid uski aas nahi tut-ti…uski roshan aankhon may hamesha ek talaash rehti hai..kahin tou kisi ek rishte may hi sahi kaash usey apna aap mil jaaye..kahin vo khud ko nazar aaye…uski mohabbat ka aks paale…per hamesha tou ye nahi hota…bhalawe hi milte hain usey..uska kamzor sa dil isi per iktifa karta hua apni dhadkanen khota chala jaata hai…dhadkanen bhi tou quwaten maangti hain…aur vo quwaten tou mohabbaton ki hi dane hoti hain…gar vo nahi ye bhi nahi…Aahista Aahista saare yaqeen saare bharam chut-te jaate hain…haqeeqat se mulaqat us waqt hoti hai jub in bharam ka saath zaruri hojaata hai…Ye zarb-e-kaari bhi sah jaati hai ye kamzor si Aurat….uske nazuk kaandhon per khuda ne soch samjh kar hi rishton ka bhaar rakha….o jaanta hai laakh kamzor sahi,uski mohabbat qawi hai..uska ezaaz hai ye, hazaron mushkilon may bhi apni baahen waa kiye apnon ka khairmoqadam karti huii pighalti huii, moam si aurat usine tou bade maan se banaii thi…aur khud ko uski misl kaha…”.Mai 70 hazaar maaon ki mohabbat rakhta hun.”

Aamina ne apne haathon ko ghaur se dekha…ab inme derd hone laga tha..kuch der tak koi cheez thaame rakhte huye ye sunn hone lagey they…yehaan tak ke ye numbness purey badan may saraaiyet karne lagi thi….tab vo ghabra ke socha karti.” Ya ilaahi kahin mai munjamid na hojaaun…meri hararaten jo meri zindgi ki zamanath hain meri mohabbaton hi ke dam se hain..kahin ye gosht post se bana dil kahin pathar ke tukde may na tabdil hojaaye….vo dil jo kal talak anginnat tajrubon ka gawah tha…anek jazbon se bhara nerm-o-gudaz tha…aaj vo khud ka hi shikaar hogaya..” Aamina ki inhi sochon ne uski khamosh nigahon se sawaal bhi noch liye…Aakhir kyon?

Duniya jis andaz may her daur se guzarti hai ab bhi guzarti rahi..farq sirf itna tha ke Amina ne Duniya ke saath dhadkne se inkaar kar diya tha…vo apni duniya may gum rehna chahti thi.jahaan koi takrar nahi thi…na koi karobar tha…agar tha tou haseen khahishon ka abshaar tha….jo kabhi puri hi na hosakeen….usne apni dhaknon ko unke benaam naghmon ko raqam karna shuru kar diya….yehin se uske zawaal ki ibitda huii…

Is dorangi Duniya ke satrangi fareb usey kha gaye….jahaan bhi koi deewanapan nazar aaya, jahaan bhi nadaan mila, usey tar niwala bana lene ko tayaar they sharer anaasar…yehi is taraqi-yafta Duniya ki naii tarraqi thi….ek deewane ko mazeed deewana karna….so vo bhi deewani hogaii…anjaane may…jaane bujhey raaston may kho gaii…

Aamina aaj bhi in zakhmon ki laaj rakhna chahti thi…inhen honton per muskuruahat ki tarha saja liya karti..apni madham dhadkanon se jadojahad karti….apne bojhal kaandhon ki himmaten jutaati…apne muzmahal qadmon ko bahalaati….’ Tumhen abhi chalna hai…apne ferz nibhaane hain..tumhaari abhi zarurat hai…” bas khuda ko us per taras aajaata…vo payaam ban jaata..hauslon may jhalak uth-ta..Meri sab se kamzor takhlikh per mera khaas karam hamesha hai ..tabhi tou ye merkey fatah kar leti hai….khatakar ko muaf karne ka hausla rakhti hai….khudgharz rishton ko apni begharz mohabbat ka sahara deti hai…her haal may apna karam kiye jati hai…uski mohabbaton may koi utaar chadau nahi aata….vo aakhiri saans tak khud ko khuda ke karam ka hissa banaaye rakhti hai khuda hi ke sahaare…

Faisla

Tapti garmion may saaye ki tarha ,jhulasti dopeher may anchal ki tarha, khuli chath per Neem ki hawa ki tarha araam deti huii shafeeq si muhafiz hasti hoti hai Maa…Waled tou ghar ke kufaal hotey hain..vo roti kapda makaan jutaane may hi umr sarf kardete hain..

saari vuzaraten tou aurat ka nasib hoti hain..so yaan bhi vazeer-e-khana ne hi saare aham faisley liye..aur sab ko amal paira hone per raazi kiya…vazeer ki nazar mustaqbal se zyada haal ( present) per thi..haal durust karne ke chakkar may mutaqbal ke anginnat mandlaate khatre nigahon se ojhal reh gaye..vuzraati committee ke membaraan ka nakaam ehtejaaj sunwaii tak bhi nahi pahunch paaya…is tarha zindgi ek na-aqibat-andeshi ka shikaar hogaii …teer jub kamaan se nikal jaaye tou phir uska dubara palat aana kahaan mumkin hota hai..usi tarha jazbaati faisla apne efa ke taqaze tale ek naii zindgi ko roshni se pehle andheron se mila gaya..

Bas Shabaz ki zindgi bhi ek aise hi faisle ka shikaar hogaiii..usey apni Maa se behad mohabbat thi..sab ko hoti hai..per shabaz ki mohabbat lazwaal thi be-nazeer thi..usey kya khabar thi..khuda deewane ko derd dekar jub apna banaata hai tou moqadas rishton may mohabbat ki tarha chalak uth-ta hai..vo kahaan nahi milta..vo wahin pe milta hai jahaan uski atta hoti hai…usi tarha naseema ko shabaz apne bete ki surat mil gaya tha…

Naseema musalsal halaath se jung karte karte haar chuki thi.usey apne bachon ki unke mustaqbal ki fikr ne raah bhatkaii..vo bhul gaii ke qader mutlaq ne sabki taqdeer likh rakhi hai..her ek apna nasib lekar hi aata hai..laakh koshish karlo us se zyada nahi milta..magar honi tou hokar rehti hai..so hokar hi rahi..

Shabaz ki jawan umangen, uski kamyaabi, uske jawaan hausle sab ek ghalath faisle ki lappet may aagaye..umr ka vo daur jo intihaii mussaraton ka hota hai, samjhoton ki nazar hogaya..Maa ki door-andeshi qareeb hoti huii azmaish ko na dekh saki..na usey shabaz ki kasmakash dikhaii di..Aan-e-wahed may shabaz ka saara mustaqbal ek junun ki nazar hogaya…aur vo bechara Maa ki ulfat ka maara uff bhi tou na karsaka…

Sabar kamaal zabt ka naam hai..khuda ne mohabbat ka sila sabr rakha..shabaz ne apni zindgi ki her kadi azmaish ko maa ki mohabbat se mansub kiya…aur khud peesta raha..zindgi donon haathon se usey peet-ti rahi…Maa ko khabar na ho saki..per ek ezteraab rehta tha..sab kuch hote huye bhi ek be-sakuni thi jo keh rahi thi ho na ho mera bacha mushkil may hai…

shahar se koson door vo apni shaadishuda zindgi ki ibteda ek neem paagal ladki ke saath karchuka tha..roz kahin na kahin zakhm ke nishaan hote..kabhi chehre per..kabhi dil per…deewangi zawalpazeer hoti bhi tou waqti taur per..phir wahi dhaak ke teen paat waala mamla tha…

jub maa ne ye nazara dekha tou vo ro bhi na saki…na apne ghaath faisle per matam hi karsaki..usey patta chala ab tak jitney ghum uthaaye they usne ,unke saamne ye ghum qayamat tha..jahaan khud apna lakht-e-jigar pis kar reh gaya tha..jis ki khatir umrbhar khwab dekhe,uske khwab be-jaan hogaye..

Naseema ne khuda ke huzur gidgida kar dua maangi” Ya khuda, mai jaisi bhi hun teri hun..aur teri atta meri khata se badi hai…mujhe koii haq nahi tha mere masum saadiq bache ke khwaab apni aankhon se dekhne ka..usey uske khwab miljaate..usey tabir paane ka mauqa nasib hojaata.Magar tune bhi apni hikmaten mere sabaq jaari rakhne they..Bakshde mere bache ki her khushi..uski khushi hai meri khushi..tu chahe tou pathar ko mom karde..tu chahe tou sehra ko chaman karde..tu chahe tou kaafir may imaan bharde…phir kyon na ek musalmaan ko tu musalmaan karde…tere siwa kaun sunega meri...tujhse hi her ummid hai meri..meri arz manzur hojaaye mere Maula..Ameen.

Vo wada nibha raha hai

Mere Ghum utha raha hai

Vo Mujh se meri khatir

Bahut door jaa raha hai