Chal mere ghodey tik tik tik.....

Uff tauba...kya waqi? is hairath per mar jaane ko ji chaha sadiqa ka....aakhir aisa kya pooch liya tha haajira ne ? 

yehi ke kya waqi tum pachpan ki ho ? sadiqa ki manikheez muskurahat per hajira ko gumaan hua ke ho na ho sadiqa mazaq kar rahi hai...hajira ne tatolti huii nazaron se dekha...bolo bhi sadiqa aakhir tumhari jawani ka raaz kya hai ? pachpan may bhi bachpan kaise bacha hua hai...

Sadiqa ne muskura kar kaha " hajira mai badi nasib wali hun..mujhe aisi zar-e-nawaz bahu mili hai ke pocho mat...Hajira ne khush ho kar poocha, " kya waqi ? "saadiqa ne puri sanjidgi se jawab diya, " haan nahi tou kya aisi bahu to nasib walon ko milti hai...jo mujhe kabhi thakne nahi deti...na pareshan hone ka koi mauqa deti hai...Hajira ne kaha, " ayeen, aisa na kahin dekha na suna...aaj tak kisi saas ne apni bahu ka aisa koi qaseeda nahi padha jis se emaan ki taaza taaza khushbu aaye...haaye aakhir ye kaise mumkin hai bibi ? 

Hajira ki hairat ke pahad they ke tut te hi na they bulke buland hote jarahe they..uski justaju may izaafa hota jaraha tha....sadiqa ko maze arahe they...hajira ki hairath bhare sawalath per...kyon ke abhi asal israr ko samne aana jo tha...

Hajira ne tadap kar kaha "ab bolo bhi...bol bhi chuko..aakhir vo konsa nuskha hai jo tumhari bahu ke haath lag gaya hai ? jo tum waare niyaare huii jarahi ho...Sadiqa ki hansi chut gaii..." sabar hajira sabar...bata rahi hun...magar wada karo ke ye nuskha tum apne tak mehdud rakhogi...Hajira ne wada kar liya wafur-e-josh may...zarur bibi zarur...

Sadiqa ne ek lambi aah bhari..' baat itni hai hajira meri bahu mujhe itna masruf rakhti hai ke soch tou soch saans ka patta bhi nahi chalta....is tarha ek dum saadhne ki warzish bhi hojaati hai...aur din bhar ke kaamon may zehen itna uljha rahta hai ke, koi aur soch paas tak nahi phatakti...so depression ki shikayet se doori bani rahti hai....baar baar ki safaii jism ko saaf rakhti hai aur chehre ko nikhaar deti hai....ye hai meri jawan saali ka raaz....

Loag kahenge haaye ye kya zamaana aagaya hai...andher nagri hai...per zara sochein...is nafsa nafsi ke daur may jub loag jama tafreeq may lage huye hain tou bahuyein kyon kisi se peeche rahein...Allah salamat rakhe unke bhaii bandhuvon ko, unke fitnaperwar maavon ko, jinhon ne saudagiri sikha di...sauda bura nahi tha gar dil ka kar lete, mohabbaton ka kar lete, insaniyet ka kar lete, yehan tou ulti ganga bah rahi thi.....umar seheth aur kaifiyet ki khabargiri tou door muskurane ki rasam bhi ehsaanon tale dab ke rah gaii...aji chath faraham hogaii ye kya kum hai, saath rahte hain ye kya kum hai, 

Bas sitam ko karam kar lene may bade fayede hain hajira....jahan mohabbat ki ummid ka shajar phal phul nahi sakta, wahan khud vo shajar banna padhta hai jis ke tale zulm ko bhi aram aajaaye....shaatir bhi sukun paa jaaye...uska dhoka hai ke uski chaal se waqt be khabar hai..haalaanke waqt her lamhe per giraft rakhe huye muntazar hai...ke kahan baagein kas li jaayein....kahan ehsaas hawason per bijilyan giraa dein...

Hajira ke chauda tabaq roshan hogaye," haaye....haaye...haaye.....ye daur ajab hai ...yehan maaon ki zindagi do paatton ki chakki hai...peesti hi rahti hai....usey ye ehsaas hi nahi hota ke usne apne hisse ki mehnath karli, usne apne tamaam farayez bakhubi anjaam diye...ab raahat ki saans lene ka waqt milne waala hai....tab chabuk kisi aur ke haath thama diya jaata hai..."chal mere ghode tik tik tik...".

Dil bhi jal gaya hoga.............

jala hai jism jahan dil bhi jul gaya hoga

kuredtey ho ab raakh justaju kya hai

Chalen aaj phir ek haqeeqi fasaana likhen, haqeeqaten haqeeqat ko kahin sherminda na kar dein bas isi liye isey fasanon may dhaal kar haal pesh kiya jaata hai..taaki padhne waale ke zauq ki taskin ke saath saath uske khayaal ko bhi perwaz mile..chund sitron may kahan dil ugla jaa sakta hai...jahan fasana khatam hota hai padhne waale ki soch shuru hoti hai, uska khayal baaqi ka fasana bunne lagta hai..is tarha ek fasana ek kahani banta jaata hai..To kyon na mai koi fasana likhun aur aap ek kahani bun lein..

Us puraane say mazbut darwaze ki lakdiyan zarur bosida theen per uske peeche rehne waala sher-dil shaks apni ek khususi aab-o-taab rakhta tha..isme uske hasb-o-nasb ka bhi dakhal tha..Akmal javed khan apni baraub shaksiyet ki chaap her zehen per chod jaate they..hatta ke unke bache bhi unki hasti ke aage apni hasti kabhi na paatey they...unke saamne taqreeban khud ko faramosh hi kar diya jaata tha...halaanke unme mohabbat koot koot kar bhari hui thi, jiska izhaar shaaz-o-nadar hi hua karta tha..ke vo jaante they mohabbat to karne ki cheez hai dikhaane ki nahi...per bache bechaare kahan jaan paate...kaash koi dil ki sergoshiyaan sun paata...tou sun leta jo baar baar apne lakht-e-jigron per nisar hojaaya karti theen..vo insaan jo unka baani tha vo faani kaise hosakta tha...yehi vo aaj tak na samajh sake..

Akmal saheb ka dorangi mizaj sirf apni biwi ke saamne zaaher hua karta...kabhi shola kabhi shabnum...us waqt bache bechaare hairath bhari nazron say unhen taktey huye miltey...Aakhir Abba huzur Ammi huzur ke aage Mom kyon hojaya kartey hain..unhen kya patta ye kaar mohabbat ka tha..jo saathi serd germ mosamon may doshaala ban jaaya karta ho uska beshqeemti nazrana hota hai ye...khuda ne bhi kamaal ki qudrat dikhaii in jazbon may...kaisa taana baana hai...silsila dar silsila, kadi dar kadi jodey rakhne ki ek asan si tarkib sujhaii bhi aur chupaii bhi...hazar tafreeqon ke bawajud hazar ekhtilafaath ke bawajud bhi ye kadiyan tut nahi paateen...inka jod bejod mohabbat hoti hai...aur jub tak dil dhadkenge ye bhi dhadkegi dil ban kar, 

Akmal saheb jaise hi ghar may daakhil huye thitak kar reh gaye..ke ghar may huu ka sunnata tha...amna unki biwi chup saadhe baithi theen, bache kone may dubke huye afsarda they...unki badi ladki ki shaadi thi...paison ka intizam ho na saka...koshishen nakaam laut rahi theen...bas her chaap ek ummid thi..Akmal saheb bhi isi tag-o-dudh may lagey huye they...Akmal saheb kamyab lautey they..unki zameenon ne unka saath dediya tha..ye khabar sunte hi ghar bhar may shaadi ki leher daud gaii..Alllah tune humari laaj rakhli...tere siwa kon yaar-o-madadgaar apne bandon ka...

Khwab tou shaheen ko dekhne aate hi na they, per apni shaadi usey khwab hi lag rahi thi...Akhir logon ka sawal jawab paa gaya tha...kub hogi shaheen ki shaadi...sawal to sab ne kiye they, per koi saath nahi khada hua tha, ye duniya khud roz-e-meheshar ka ek namuna hai, yehan bhi log nafs ke maare hain aur khud say hi haare hain...per shaheen ko sukun mil gaya tha ke aakhir meri bhi gaadi chal padi, jis shaandar junction per ruki thi vo her shaye say zyada azeez tha jaan say pyaara tha, phir bhi usko tou safar karna hi tha...so vo apne safar ke liye tayar hone lagi...usey kya patta tha ke ye safar uski manzil badlne waala hai...

Shaheen ko sasural sidhaare paanch saal beet gaye...is dauran uske ghar aur doliyan sajeen ,Akmal saheb ke kamzor kaandhe unka wahed sahaara tha..isi isna khabar milti rahi ke shaheen apne shahuhar ke atwar say zakhmi hoti rahi...mukhtalif wajuhaath theen jinhon ne usey rafta rafta tod daala...khud say yehan tak ke khuda tak say mayus kar daala...apne waled ke ghar wapes lautna mumkin hi nahi tha uske liye, kyonki vo ek ghayur ladki thi..aur is dauran inke darmyan aur bhi rishte ban chuke they...madrana,vo kis kis say muh modti.

Ek din achanak khabar mili shaheen is duniya may nahi rahi...vo din Akmal saheb ki zindgi ka sab say badtareen lamha laaya tha..unhen apni vo beti behad azeez thi...vo tou ro bhi na sake...is saanihe ke peeche ek namaqul shaks ki napaidaar zeheniyet thi, jisne apni kotahi say ek beshqeemti wajud ganwa diya,,,uske apnon say unka apna chin liya...unki zindgi ka ek afzal rishta zaaya kar diya..apne bachon say unki maa chin li...kitne rishte is karb ki zad may aagaye they...kya haasil hua tha is shaadi say jiski tamanna maatam may dhal gaii thi...kisey patta tha ke waqt insanon ko daur ki nazar karta hai, aur aksar daur insanon ko insanon ke hawale kar dete hain..

Ek kamzor pal ek zeefaham ladki say uski zindgi chin le gaya...na vo taareekh bani na yaad..bas maazi ban kar reh gaii...kyon ke uske baad jitne bhi daur aaye machini they..sab machinon ki nazar hogaye, khud machine hote chale gaye....aisi ya is say milti julti kaii kahaniyan roz janam leti hain, bayan hoti hain..per samajhne waali baat ye hai ke humen zindgi ke her zawiye per nazar saani karni chahiye...taaki faham ki roshni may haqeeqat roshan hosake...aur her masle ka sahi hul nikal sake...koi masla zindgi say bada nahi hota..aur khuda ne insan ko dil ke saath dimagh bhi atta kiya hai..to phir insan apni saleem tabayee ka istemaal kare.bhale bure may tameez kare..sahi ghalath ko pehchaane..kaanton ko raaston say chuney...aur apne angan ko gulzar banaaye.

Najat-Dahinda

Saara aaj bhi achanbe may thi kal bhi hairaan thi..khwab-o-gumaan say parey ek aisi haqeeqat ki shahid hona kisi ezaaz say kum nahi tha...ye tou mominon ki meraaj hai...Hum say deewanon per ye karam kaise hogaya...Ya Allah tu jisey chahe nawaz dey...jisey chahe nakar de...uski her yaad itr-o-gul ki tarha aaj bhi mehekti hai...aur wahi gul baar baar uske khayaalon may khilte rahe...hatta ke her din ke her pal ko mehkaate rahe...maano zindgi ko naya mafhum mil gaya ho...

Vo chehra kyon jaana pehchana sa laga...Jub ke mulaqat bilkul pehli thi...per unsiyet ka ehsaas jaana maana tha...Akhir ye raaz kya tha...Khair waqt ne itni muhallat hi kahan di ke is baat per mazeed ghaur karte..uske baad jo bhi ghata badi tezi say aur be-ekhtiyar...Saarey ekhtiyarat chin liye gaye...bas munjamid soch per ek hi ghulba tha...ke aisa kya ho jis say mai hamesha uski humnasheen rahun..uski sohbat may khudfaramoshi ne sama-aten tez kar di theen...Ankh thi ke mahu-e-khwab thi dil huma tun gosh...Shayed honi ko yehi manzur tha...magar saahir ko khud khabar nahi ke seherzada bakhabar bhi tha aur bekhabar bhi...

Bekhabri tab talak thi jub talak betabi thi.aur ye tou bakhshi gaii thi..kada imtihan tha...jub ke sawal hi na samajh may aaya ho tou jawab kahan say milta...Jub talak khahishen sawaali theen tab talak faham ko aram tha...aur usey kisi jawab ki justaju bhi na thi...kyonki muddua bas itna tha rubaru-e-yaar zuban tak na hile...bas saans chale aur dhadkan ki khabar bhi na ho...per baatin ki sargoshi bhi vo sun liya karta tha...her tashveesh jo aah tak ka safar bhi na kar paati thi uski ankhon may nazar aajaaya karti thi...Aisa kyon kar hojata tha...is sawal say bhi azad tha dil ka yaqeen...ke yehi hai vo...mera najat dahinda....mujhe gardab say nikalne aaya hai...meri dubti nayya ko paar lagaane aaya hai...

Jub say saara ne hosh sanbhala Khuda ko uske her derd ne pukaara...wahi ek aisa dost tha jo bin bataye samajh liya karta hai aur mushkilon may aram diya karta hai...ke uski takhlikh us say kahan juda hai...uski rooh ban ke jo rah raha hai ye wahi khuda hai..Barson ki pukaar ka jawab khushnuma shakal le chuka tha...aksar jawab mujasim bhi hote hain ye jaana usne...aur jub inayet shakal lene lagti hai tab paane waale ka daman phailne lagta hai...maang shadeedtar ho jaati hai..aur ye inayet tou sirf ehsaasaath per huui thi....per is dil ko kya kahiye jisey baat aate aate samajh aati hai....per teer tou kamaan say nikal chuka tha..shikaar aur shikaari dono shikaar hochuke they...ab jub ke safar ehsaasath ka hai jaari rahega....

Ek Baagh Sunehri.................

deewaanaa banaanaa hai to deewaanaa banaa de

warnaa kahiiN taqdeer tamaashaa naa banaa de

Raah chalte raah ka mil jaana mumkinaath may say hai  ,kya aisa hosakta hai, haan aisa hua bhi..raah mil gaii thi...aur is safar aur manzil ke darmyan nafsiyaat ke saare sabaq padh liye they usne....Akhirkar mohabbat aur khahishon ka farq samajh may aa hi gaya usey..khahishen be-chain karti hain aur mohabbat sukun ka sabab ban jaati hai..Ab ye waqt waqt ka taqaza hai ke dil kis ki taraf raghib hota hai, kub khud ko sahi taur per samajh paata hai..Ke aye dil tujhe kya chahiye....nasha chahiye ke derd chahiye....nasha tou madhoshi ki raah per lejaayega...aur madhosh ke haath kuch nahi aayega....Derd  kabhi madhosh hone nahi dega....bakhabar rakhega.....ke kub mafhum miljaaye asli zindgi ka..jahaan sirf ek hukumat chalti hai...jahaan her khoobi iradon may palti hai..jahaan her subah ek naya paigham le kar  milti hai....

Aam say logon ki aam si baaten hoti hain...Vo bhi bas aam si aurat thi...apni duniya may simti huii , khwab dekhti, khwab may hi khwab ki tabir dhundti, haqeeqaton say jujhti,khud faramosh si...zindgi tou waqt ka saaya hai..chali jarahi thi tez raftar...khwab tabir haqeeqat in sab ka dayera bhi phailta jaraha tha...bas faraq sirf itna tha kabhi khwab apne liye dekhe they ab apnon ke liye dekhti...unki tabir khwabon may kaise paa sakti thi...unke liye tou tag-o-dudh karna thi...kiye jarahi thi..

KHUDA KHAMOSH DEKH RAHA THA KUB SAY USKI MUKHTALIF MUNTASHAR KHAHISHON KO...KEHTE HAIN QABULIYET KI EK GHADI HOTI HAI USKA MILNA ABHI BAAQI THA...

Ek din vo bas chali jarahi thi apni dhun may..khachakhach bheed thi ke chatne ka naam nahi le rahi thi..kisi ka haath uske jism say mas hogaya...vo lams naya tha jis say vo ab tak anjan thi...aur vo lams goya ehsaas tha is baat ka ke insan apne nafs ke aage kitna kamzor hai...lamhati luzzaton ne uski sochne samajhne ki salahiyeton ko gum kar diya...bas aise hi ek ehsaas ne us say kaha ho na ho ye meri taqdeer thi jiski vo kub say muntazar thi ke kabhi tou vo mujh say aa milegi...kabhi tou mai uski aghosh may ji uthungi...kabhi apne hosh lungi...kabhi uske hosh lungi...

Vo nadan kahan jaanti thi waqi vo uski qismat hi thi jo uski puri zindgi badalne aai thi...Uski soch ka her zaviya, uski zindgi ka mahavir, uski khahishon ka maqsad, uske khwabon ka matlab...uski koshishon ki haqeeqat....Ab uske derd ko dawa karne ka waqt aagaya tha...uski tamaam aziyeton ka azala yon kiya gaya....Ek haqeeqat sarab ke bhes may pesh huii....uski haqeeqat say usey milaya gaya....fareb say hi sahi usey raah-e-mohabbat per chalaya gaya...phir uski nazron say perda uthaya gaya....machalna tou tifl ka shewa hai...tadapna tou nadanon ka pesha hai....be-qarar qarar paana hi nahi chahte...warna apni be-qararion say faraar paa lete..."jub khuda meherban hota hai tab kahin jaa kar koi insan, insan hota hai...warna usey sirf insan hone ka guman hota hai."

Yon zindgi samjhaane bazaat-e-khud mohabbat chal ke aai thi...Aah...kaisi sunehri qismat usne paai thi...her vo khwab jisne subah ki tamanna hi nahi ki thi, is haqeeqat ke ujaale may kho kar gum hogaya...Her maang dil ki pasheman hogaii...her arzu ne sar jhuka liya...Arzoo ne kaha "mai hun zarur magar wahan tu hi tu hai"..

Darasal khushi insan ke apne andar hi hoti hai aur hum usey her kahin khojte rehte hain...Halaanke ye dene ka naam hai..Khushi paane ka nahi khushi baantne ka naam hai....jub kahin koi noor ka haala kisi chehre ku munawar karta hai tab waqi dil may chaand uter aata hai...

Ye Ishq Nahi Asaan

Najane vo kis ka muddua tha jo dua ban gaya....Kitaaben inhi tajrubaat ka hi natija hain...Ehsasaat jub tak seene may  rehte hain khoobsurat hote hain. Jub ye tahreer may dhalne ko machal uth-te hain tab ye rangeen hone lagte hain...Rangeen yon ke her padhne waali aankh unhen apne rang may dekhti hai. Yon ek rang mukhtalif rangon say jaa milta hai...Mohabbat sab say khoobsurat, sab say anokha, aur sab say besh-qeemat jazba hai..Her dil isey mukhtalif andaz may jeeta hai...Aur her dil ki ek alag kahaani hai...Aaj aap sab ke rubaru ek dil ki zubaani hai....

Mohabbat ne aakhir kub kisi ko bakhsha hai, vo her dil may dhadki hai, vo her arzoo may tadpi hai, vo her aankh may machli hai. vo Aah ban kar her lub say phisli hai..Haan magar mohabbat ki haqeeqat kitne jaan paaye hain..Kisi ki chah may khud ko tadpaaye rakhna, ya kisi ki arzu may apni hasti say juda hojaana, ya phir kisi ki hasrath may khud jal jal jaana....kya yehi mohabbat hai...Vo aag jo tan mun jhulsa de kya mohabbat ho sakti hai...Hijr ke geet kya mohabbat ke ehsaas ki sahee tashreeh kar paayenge....umhm...nahi aye bani Adam...mohabbat in naam nihaad dhakoslon ka naam nahi hai....Na hi kisi chonchle ka naam hai...Mohabbat tou bazaat-e-khud ek paighaam hai...jo ek dil say dusre dil tak nashar hota rehta hai..Aur ye un dilon ki saughaath hai jinki justaju ko jawaab bakhsha jaata hai....Aisi hi ek khushbakht ki daastaan hai ye....

Usey kya patta tha ke ye safar usey ek aisi raah per le jaane waala hai jiska  tassawur uske khwabon may tak na tha...Aankh khuli bhi thi aur mahu-e-khwab bhi....maano khud hi sawal ho khud hi jawab bhi...Gadi ki raftar hawason say ojhal thi...bas ek tajruba tha waqt..ek aisa tajruba jo aane waale kal ki tareekh banne waala tha...jo ek aise israar ka perda faash karne waala tha jo ta-zindgi fariyaal ko ek aisi haqeeqat ka shahid karne waala tha jo perda chahti hai azal say...is perde ke sarakne ka yehi maqsad ho sakta hai ke koi dil herkat may aaye...usey mohabbat ka asal mafhum samjhaaya jaaye...Mohabbat mohabbat pukaara kiye, jub us say mile tab apni haqeeqat tak bhul gaye....Hamla achanak hone waale waar ko hi kehte hain...so ye hamla shab-khoon to tha per uske nataayej deirpa they.Taumr ek aisa morikh inayet kar gaye jo rehte dum tak us lamhe ki tabligh karta rahega...

Ye kya herkat hui thi seene may...ye kaisi beqarari jaagi thi...ye kaisa ehsaas tha jo qurb may bhi hijr ke geet ga raha tha...vo paas ho kar bhi kitna door tha...us pehle lamhe se jo shikast khaai thi dil ne bas tilmila hi tou utha tha vo...jis tarha ek tifl apne pasandeeda khilone ke liye machal uth-ta hai bilkul usi tarha....per is ehsaas ki haqeeqat ko paana joo-e-sher laane say kum nahi tha...abhi tou pehla qadam tha...abhi raah taweel thi...abhi bahut kuch jhelna baaqi tha....dushwarion may hi tou faham-o-adrak ki raahen khulti hain....warna koi sunn zehen gar luzzaton may doob gaya phir kisi kaam ka nahi rehta....ye mushkilen hi tou us ko jagaaye rakhti hain...aur ye lazawal tadap ek aisa hurba hai jo her us dil per azmaaya jaata hai jo mohabbat mohabbat karta hai....

Vo lamhabhar may us lamhe say bichad gaii...us waqt vo ye kahaan jaanti thi ke jiske firaq may dum nikla jaraha tha, vo tou uske saath holiya tha, uska ehsaas ban kar, uski dhadkanon may jazb hogaya tha, uske her fale may poshida tha vo..zuban apni thi pyaam uska tha...jism apna tha ghulaam uska tha....Haan dil saaheb-e-dil ka muayina karne may masruf tha...ke aaya isne raaz-e-mohabbat paaya ke nahi...dooriyaan nazdeekiyaan, hijr-o-visaal, khahishen, derd, tadap, beqarariyaan, in sab ko aram us waqt mila jub baat samajh may aai....Mohabbat ki koi maang nahi hoti, na hi koi beqarari hai...mohabbat tou ek mukammal jazba hai, ek kaamil samjhdari hai...mohabbat pyaari hai...zarre zarre may jo jalwanuma hojaaye usey kahin dhunda nahi karte.....jo dum dum may rehte hon unke liye aahen nahi bharte...mohabbat jo karte hain koi shikwa nahi karte....

Mohabbat ek mukammal suprudgi hai...Mohabbat ek mukammal ibadat hai...Gar ye hawason pe bijliyan giraaye tou shararat hai, gar ye hawason may laaye tou inaayet hai...Gharz jis per iski haqeeqat khul jaaye samjho us say khuda ko mohabbat hai...

aaina-o-dil dono kehne hi ki baaten theen

teri hi tajalli thi aur tu hi muqabil tha

Kal bhi Aaj bhi...................

Jub uske rishte ki baat chali tab uske khayaal ne jast itni surrat say lagaii ke usey khwab aur haqeeqat may tameez hi na rahi...na ghaur karne ki muhallat hi mili...yon ek khwaab pareshaan mazeed pareshaan hone ke liye tayaar hone laga....Ab ye tou aap samajh hi gaye honge ke aqal-o-faham ka wahaan guzar hi nahi jahaan dil-e-nadaan ki arzoo ne jaal bicha rakha ho....So Rukhsaar ne apne rukhsaaron ki laali inhi ghaflathon ke naam ki.....apni deewangi ki yon subah-o-shaam ki.....Apne humsafar may usey kis cheez ki talaash thi ....usey kaisa humsafar chahiye tha...uske dil ki kya chahat thi...ye sab sirf is khayaal ne bhula diya ke uske sisakte subah-o-shaam ko naya asmaan milne waala tha.....uske ansune adhure jazbaat ko ek naii zameen milne waali thi....per vo bhul gaii thi ke aane waala kal aur kaii naye naye tajrubaat liye uska muntazar hai...

Yon ek deewani,kahaani huii....yon ek kahani andekhe andeshon ki zubaani huii..Log bhala vo nigah kahaan say paate jo haal  ka aane waala kal jaan leti..usi tarha Rukhsaar ke gharwaalon ne bhi tamaam andeshon ko balaa-e-taaq rakh kar Rukhsaar ka faisla kiya...Rukhsaar ki zehni kaifiyet ajib mod per thi....Aane waale pal sansani-khiz zaruru they per andeshon say bharpoor....usey kya patta tha ke uski yehi kasmakash usey humsafar ban ke mil gaii hai..Zindgi ko tou her haal may guzarna hota hai...Koii rukna chahe, koi mud jaana chahe bhi , uske ekhtiyar may kahaan hota hai uski lagaamen thaamna, uski raftaar ko rokna....uske bas may nahi hota....yehi bebasi zehni koft ka sabab banti hai...yehi zehni koft jadojahad ke maraahil taye karti huii ek zindadil hasti ko kaii hisson may baant deti hai..yon Rukhsaar but gaii apni hasti may....

Waqt ka carvan badhta raha....her pal kuch na kuch naya milwata raha....Rukhsaar ne apne tamaam khwabon ki tabeer apne bachon ko sonpi...Unme usne apne vo jazbaat widiyet kiye jo usne apnon may dekhna chahe they, jahaan usey vo na mil saka tha jiski vo mutlaashi thi...ek saada aur nafees mehekti huii zindgi...jiski khushbu nasal dar nasal muntaqal hoti rahe....Uski umrbhar ki yehi koshish rahi aur kamyaab bhi huii..Khudavand ne uski jahad ko qabul kiya aur Uski dua maqbul huii..

Zindgi waqt ke saath badalti hai,waqt ka alag hisaab rakhti hai...Phir usne waqt ki maang ansuni kardi...Usne apne siwa sab ke dil sune...Usne phir apni khushion ko peeche choda...uski aankhon may unki khushiyaan sitaara they jo uski aankhon ka taara they...Yon phir dil-e-nadaan ne khud ko manwa liya...Apne bachon ki zindgi ka faisla bhi dimagh say nahi dil say kiya...Aur phir say usne apni kotah andeshion ka phal paaya...Ab kya hosakta tha....usne apne Aqa ka ek wateera hamesha apnaya tha hamesha hi...wada nibhana....zubaan-o-dil ka paas rakhna ...kisi ki khushi ka khayaal rakhna...yon ek dil kaii dilon ki khushi ki chah may maara gaya....

Aaj vo kaii rishton may buti apni hasti say bichad gaii thi...Aaj vo apni Bahu ki Saas nahi thi...bulke vo aaj bhi bahu hi thi..kyon ki usne tou rishton ki taqdeer likhne waale say apne liye kisi buland rutbe ki khahish jo nahi ki thi......Na usey hukumat raas aasakti thi...ke uske mizaj ke ansar khushdil they...vo sab ko eksi chahat dena chahti thi...Aise may ye tou hona hi tha...Tamaam rishton ki ummiden us say yon wabasta hogayeen ke vo un ummidon ke darmyaan dub kar faramosh hogaii...Aur sab ku uski yon adat pad gaii ke unhon ne usey apni zindgi ka ek kalpurza bana liya...jisey na dil ki shikayet hosakti thi na jazbaat ki....

Vo bahu ban kar jub apne sasural gaii thi tab bhi usne yehi socha tha mohabbat say dil jeete jasakte hain...per vo dil jinka naam sasuraal hai ek aisa qila they jisey jazbe taskhir na karsakte they....phir bhi najaane kyon unse mohabbat kum na huii...yaane marz badhta gaya joon joon dawa ki....Jub apni baari aai sasuraal may tabdil hone ki tab bhi yehi khayal tha ke maine jo boya hai wahi phal dega.....magar yaan bhi ek faseel khadi mili...hisaab-o-kitaab ki chopdi thama di gaii...ke ye had teri hai...vo had meri hai..."Hamaara" tou kuch bhi nahi hai...Rukhsar ne tou saara jag jeetne ki tamanna ki thi...yehaan tou chund dil bhi na haath aaye...jinper uska haq tha unhon ne bhi usey uske haquq say mehroom kardiya....Ye khwab nahi tou kya hai jo haqeeqat say koson door lagta hai....

Jo hukumat usne kabhi sochi bhi na thi....vo un rishton ne usper ki jinhen khud may jazb karlene ki tamanna thi..Jinme apne ansar ke nishaan dekhe they unsay apne liye chund lamhe "apne say" chahe they usne...kya kabhi aisa bhi hoga...Hosakta hai..Gar Khuda chahe...

Nasha

Kehte hain her nasha jo sar chad kar bolta hai vo kabhi na kabhi uterta zarur hai...waqti khumaar intizaar ka haamil nahi hota....kya kijiye in nadanon ka jo farar ki raahen laghuviyet may dhundte hain....zindgi ka maza badmaza shaye say kaise haasil hota hai...Gandagi gand hi phaila sakti hai....Ye fitur bhi kisi sadandh ki hi ikhtra hoga...log aakhir kya bhulaana chahte hain....jin halaath say roz saamna hota hai unsay aakhir muh kaise phera jasakta hai....vo ghum jo insaanon ki dain hain kya itne taqatwar hain ke insaan ko itna kamzor bana dete hain..ke vo aarzi sahaare dhundne lagta hai...rafta rafta usey in khokle sahaaron ki adat pad jaati hai...phir adat beemaari may badal jaati hai...aur ek beemaar dimagh aakhir koi sahi faisla kahaan kar sakega...Aur yon zindgi ji ka janjal ban jaati hai...na jeena raas aata hai na marna....Ek kamzor jad purey darakht ko hila kar rakh deti hai...vo shaaken jo isi darakht ke aasrey per tiki hoti hain aakhir unka kya qusur hai....sazayen tou unhi ko milti hain jinhen na saaya milta hai na sahaara....Aakhir ye madhosh samajh kyon nahi jaatey....ke ek marz ka ilaaj dusra marz nahi kar sakta...haqeeqaton ki kadwi goliyaan shifa ki raahen kholti hain.....tanbeeh bhari nigaahen hamesha sach bolti hain....Aapki asli rahnuma hoti hain...so sunen zara unhen ghaur say.....na ghabraayen khud apne hi shor say....

Hmmmmmmmmmm ye paimaane jo ayesh-kosh ke raahi hain, kisi ko deewana kaise bana sakte hain...Deewanon ke liye tou khaas nasha darkaar hota hai jo kisi maadi shaye ka mohtaj nahi hota...vo surur kisi insaani dimagh ki upaj nahi hota...vo tou atta hota hai....Vo jaam-e-farhat nazron say pilaaya jaata hai...Roohon may utaara jaata hai...jahaan jismon ko bhulaaya jaata hai.. Rahbar humrahi hota hai, roohen musafir...Bas ek lateef ehsaas hota hai khud ke adam hojaane ka...

Bas kuch dinon say haal aisa hai....na khayaal hai na gumaan hai....na hosh hai na apne hone ka nishaan hai..jis simt usne chala liya wahin mera makaan hai....ab zindgi kehti hai jo sunti hai...ke abhi daras baaqi hain, jaari hain, ke mai zinda hun abhi....