Mohabbat ke usul

log kehte hain zamaana badal gaya hai...log wahi hain...soch badal gaii hai...ye kyon aur kaise badal gaya hai...kis ke zehan ki upaj hai ye...ye badlau eklakht aan-e-wahid may tou zahur pazeer nahi hua hoga...is tabdili ki koi wajah tou rahi hogi...iske peeche koi sabab zarur karferma raha hoga...aakhir vo hai kya....aur is tabdili ki zarurat kyon kar pesh aai hogi...puraane waqton may basne waalon ne kya kamyaab zindgi nahi guzaari thi...beshak guzari...aur aaj bhi un doorandesh zehnon ke qaul mehfuz-e-qalam hain...dilon per raqam hone waale...anmol khazaane...tou phir aakhir ye kaisa nayapan tha jo naumd ke liye machal utha..


Ek zi faham ki soch kya kehti hai...ye insaani zehen ki irteqa ka dusra rukh tou nahi, jo aaine ka dusra rukh dikha raha hai...vo jiski khud aaine ko tauqa na thi...tabdiliyaan agar khushnuma hon dilpazeer hon tou bhali lagti hain..tabdiliyaan gar khush haali ki zaamin hon tou bhali lagti hain...tabdiliyaan aman-o-amaan ki khaatir hon tou bhali lagti hain..tabdiliyaan waqt ki maang say zyaada azaadi-e-nafs ki taraf jub maayel hone lagen tab khatarnaak saabit hoti hain..ye zahreele maadon may tabdeel hojaati hain...ye naii paud ke liye jaraaseem ban jaati hain...unki nashonuma ko keed lag sakta hai..phir is naii fasal ki nashonuma ruk sakti hai...her vo shaye jo inka baani hai saath tabaah hone lagte hain...phir kuch nahi bach paata...na soch, na zehen, na insaaniyet, na insaan....


Aisi tabdili kis kaam ki, jisme koi khushi shaamil na ho, faham-o-adraak ka koi dakhal na ho...kawwa chala hans ki chaal phir khud apni bhi bhul gaya...is taqleed say kya haasil...apni pehchaan banaaye rakhna hi kamaal hai...hans ne tou kawwe ki taqleed nahi ki...phir kawwe ko kya padi thi taqleed ki...ye ek kamzor zehen ki alamat hai ke usey apni khoobiyon per etbaar nahi tha...khuda ne her jaandaar ko bamaqsad hi dhaala....warna sab ekse hote...sab ki qismat eksi hoti...phir is jahaan aur jahaan waalon ke hone ka maqsad hi faut hojaata...yeh mohabbat ke usulon ki kahaani hai...mohabbat tawakal sikhaati hai..mohabbat mehbub ban jaati hai...mohabbat khud may dar aati hai...mohabbat khud ko mumtaaz kar jaati hai..mohabbat dil jhukaati hai..mohabbat taaqat ban jaati hai....mohabbat khaalikh ki isi etbaar per kaamil hoti hai ke usne her insaan may apni mohabbat ke rang hi bhare...unsay isi taqleed ki ummid ki....taqleed is say behter koi nahi...koi nahi...koi nahi...