Ehsaas na hon tou kisi bhi jazbe may koi husn nahi.
Ehsaas nah on tou kisi bhi rishte may koii pehlu-e-roghbat nahi.
Ehsaas hi ke dam se qayam hai insaan ki junnat..
Ehsaas hi tou raah-e-amal ke liye tayaar karte hain..
Ehsaas qudrat ka izhaar hain…
Ehsaas zindgi ka iqraar hain..
Ehsaas amal ke talabgaar hain..
Ehsaas ke dam se kaainaat ke manzar gul-o-gulzaar hain..
Gharz Ehsas na hon tou ye jahaan,jahaan waaley sab bekaar hain…..
Ehsaas aksar sahi waqt may insaan ko bedaar kartey hain...Ehsaas kabhi bade hi ajeeb rangon may milte hain..Admi jub apne aap se majbur ho kar koii qadam uthaane per jub tayyar hota hai,tab ye dil ka darwaza haule se khatkhataate hain..Aahista se halki si jharri bana kar jhaank lete hain..bas yehi ehsaas, ke uski humawaqt hum per nazar hai,qadam ko rok leta hai,zehan bedaar karta hai..tere faisley tere liye behter nahi hain…tu khud apna nahi hai..tu jis se wajud may aaya hai huma waqt usko teri fikr hai..jo tere haq may behter hai sirf usi ko khabar hai..so aye dil-e-muztar,zara teher,khayal kar ,uske khayaal ka,ehsaas ki tarha jo tere paas hai,jo saath hai ban kar tere sharf ka martaba , tu bas apna karam nibha..tu khud ko yaad rakh ke tujh may hai khuda…tere Ehsaas hi rahbar hain tere…tera rahbar tere saath hai…wahi denge tujhe teri manzil ka patta….
Ehsaas ka ek ankha safar,raah-e-ishq ki hai ibtida..
Ehsaas ki hi hai ye saahiri,majaz paaleta hai khuda…
Ehsaas ban kar hi tou milta hai zindgi ka muddua…
Her taraf ehsaas jalte hain kahin khanqa honk e charaghgaah…
Her dil ki hasrath kahe yehi ehsaas hi tou hain meri paanahgaah…
Log kehte hain khwab koshishon ka buniyaadi juz hote hain…jub tak khwab nahi hongey unhen pane ki jadojahad bhi nahi hogi..magar kuch khwab adhure hi khubsurat hote hain..kyonki vo aankhen jo adhure khwabon se hi mutmayeen hojaati hain vo jaanti hain apne khwabon ki haqeeqat…unki takmil ki khahish aur khwabon ke darmyaan ek haseen faseel khadi karke khud ko dayra-e-zabt may muhith kar lete hain.ye vo dil hain jo apni haden pehchaante hain.ye vo dil hain jo apna anjaam jante hain…ye vo dil hain jo apna inaam jaante hain…
Jahaan kisi ka khwabon may basera hota hai uska her daur sunehra hota hai…duniya-o-mafeha se bekhabar apne khwabon ki nazar hojaata hai…khwab haqeeqaton may dhalne lagte hain aur haqeeqaten khwaab si lagne lagti hain..waqt khwabon may simat kar apni chaal bhul jaata hai ..wahin unhi teherey huye palon may koi daastaan banney lagti hai…khwaab apni shiddat rakhte hain..haqeqaton ko khud may lapet lete hain..aur haqeeqaten faramosh kar di jaati hain..aur khwab junun may badalne lagte hain.
In Khwabon ki koi manzil nahi hoti..inki tabir ka koi khwaab nahi hota…ke vo dil jaante hain apni khahish ka anjaam….magar ek aisi duniya bana lete hain ye jahaan sab kuch unki arzu ka aks sa hota hai..aur ye deewangi nasha hojati hai…aur ye nasha zindgi ko shadaab karne lagta hai….vo nasha jo khayal se khwab tak ke safar ka haasil ho…derpaa nahi hota…jub tut-ta hai tou phir pairon tale zameen tak nahi chodta….dono suraton may khwab zakhmi hojaate hain…sisakte huye pal apni nadanion per khul kar ro bhi nahi paate….ansuvon ka bhi haq nahi hota…badi be-basi hoti hai..halaath,jazbaat ,sirf sadmaath may dhal kar reh jaate hain….
Nafsiyaati hamla hota hai un naazuk palon per jo teher kar bhi teher nahi paatey…vo hurf-e-ghalth ki tarha mitaa diye jaate hain un zehnon se jo apni safaii may kuch kehne ka mauqa haasil nahi kar paatey…apni safaii ke liye tayaar kurda daleelen khokli lagne lagti hain…kahaan ghalath hain hum…arzu gunaah nahi..khwaab jurm nahi…hasraton ki koi saza nahi…haan ye khud feramoshi ka hi kamaal hai..in sunnaton may,in khamosh palon may in be-hiss lamhon may….Kuch bhi tou apna nahi lagta..na khwab na haqeeqat…………..
Qismat ! aksar soii huii qismat apni taweel shab se uktaii huii ek subah ki muntazar hoti hai..ek aisi subah jis se aankh mila kar usko yaqeen hojaaye ke ye wahi hai jiska mujhe intizaar raha hai kub se…sadion saalon zamaanon se….ek khushaaind zindgi ka khwaab…her dil inhi khwaabon ka jawaab talaashta hua…apni qismat ki ore dekhe jaata hai…koshishon ki kamyaabi ka zaamin bhi qismat..mayus ujdi huii shaam ka dilaasa bhi qismat…ek be-shara ka sahaara bhi qismat…ek kaali shab ka sitaara hai qismat…ek saawaali dil ka naara hai qismat….ek ummid ek sahara hai qismat..kaatib ke haath jub qismat likhte honge tab in anginnat mukhtalif taqdeeron ke faislon per kitna roye honge kitna masrur huye honge najaane apne ahkaam bajaa laatey waqt ek lamhe ko bhi ye khayaal aaya ho, hikmat ne qismat ki samjh kitnon ko bakhshi hogi?…hakeemi, kareemi ki taraf maayel hone may jo waqfa lagaati hai wahin ruki tehri ek-tak dekhe jaati hai qismat…kitnon ki khahish hai ye ke agar kabhi ye mujhe il jaaye tou “puchenge apna haal teri be-basi se hum”
Tarranum ki taangen bus ke intizaar may shull hochuki theen…ye rozmara ka maamul tha..in laambi laambi linon may buson ka intizaar karna…aur un linon may usi ki tarha muntazar musafiron ke chehre padhna..aksar chehre kitaab hote hain…qismat apni lakeeron ka jaal unke chehron per hi bunn deti hai…tarranum ko apna aap un lakeeron may gum hota dekhaii deta…mai kahaan hun in lakeeron may…ye lakeeren abhi mujhse koson door hain…qismat abhi mere haal per meherbaan hai…ye saari kaali parchaaiyaan in gehri aankhon ki chilmanon taale chupaali hain..abhi mujh per qismat ki karwaton ka koi asar nahi hua hai….vo is bheed may khud ko gum na karsaki..bas unhen chupke se dekha karti aur socha karti” kaash Aye Maalik, mai tujhse sabki khushiyaan maang sakti…maangun bhi tou unki takmil ka waada talab karsakti…soch ki perwaaz bas yehin tak tou hai…khayaalon ka safar apni bulandiyaan taaye tou karleta hai…per aankh khulte hi jitni surrat ke saath paspaai ka saamna karta hai vo koi ehsaas baaqi rehne nahi deta…bas inhi sochon may ghaltaan line may aage badhti rahi.
Bus jaise hi dikhaii di sabke chere khil gaye…ab tou awaam-un-naas ke khidmat-gaaron ke khokle daawon may bhi koii dam nahi raha…bas voton ke haasil karne tak zubani naaron may simat kar reh gaii thi awaam ki qismat.. ab unki ankhon may koii ummid kal ki nahi…ke vo kal isi aaj ka hi janma hua hoga..aur saare shobon ki tarha transportation ka shoba bhi apni misaal aap tha..jub pura mulk hi beraahrawi ka shikaar hai tou mai kyon nahi….mujhe kya log dhoop may sukhen ya chal chal maren…so buson ka apne tayeshuda waqt per aana tauheen samjha jaane laga hai..aur log tou intizaar ke aadi hote hain…ek aur intizaar ye bhi sahi…ye afratafri roz ka maamul tha…badhawas pareshaan log apne hawason may kahaan hote hain….aur tarranum ki majburi ye thi ke is dhakam-dhakka bheed may khud ko bacha kar sawaar hona aur apni manzil tak pahunchna…
Tarrannum ne bachpan ka khubsurat chehra khud may mehfuz rakha tha ab tak…halaath tou soch per munhasar hote hain.insaan ka dil jis andaz se zindgi ko mehsus karna chahe…zindgi usey waise hi lagti hai..usey tou ye zindgi, sirf ek baar milne waali zindgi ,niyamat hi lagi…haseen…be-panaah khubsurat…her lamha jazbon se bharpur….her surat chahe jaane ke qaabil..aaj ka taqaza bhi manzur karna tha usey kal ki sherton ki tarha…uske jawaan hauslon ke saathi yehi tou they….vo khayaal jahaan hama-waqt ek sergoshi gunja karti…aas paas bikhre in chehron per,in be-jaan aankhon may,apni zindi phunk de…jahaan khushion ka besh-baha khazana Qaliq ne poshida rakh diya tha..zindgi yehi kehti rahi.. ye Duniya ek kasmakash hai..jo is se bach kar nikal gaya vo kahaan jiya…jo inhi se apni raah paa gaaya wahi ji gaya…bas vo bhi jiye jaarahi thi kasmaksh-e-zindgi ke her baab se kuch na kuch haasil karte huye….
Safar ko tou taye hona hota hai..vo kahan qismaton ka haal jaanne ki haisiyet rakhta hai..ek sitaara kub se tarranum ki qismat per rashk kiye jaaraha tha…aakhir is dil may khuda ne aisa kya rakh diya hai ..jo isey meri zarurat nahi hai…ye tou wahi hai jo usne adam ke seene may rakhi…ye wahi hai jo khud Rab ne apne liye moqadar ki…ye wahi hai jo isne apne bandon ko qismat ke iwaz inaayet ki…Mohabbat ko ibadaat banaa daala…aur khud mohabbat ban baitha…is se khubsurat khuda bande ki chahat kya hosakti hai..
Tarrannum zindgi ke her moqam per khush-o-khurram dikhaii di..usne apni zindgi aas paas bikhre her rishte ke labon per saja daali..vo rishte jo bas bantey chale gaye vo samete chali gaii….unka silsila ab tak jaari hai…jaari rahega….Insha Allah...
Ye un dino ki baat hai jub mushkilon ki musafaton ne thaka rakha tha…aur humne us waqt waqi derd ka naam dava rakha tha….Sach…inhi se udasion ko qarar mil jata tha…inhi se mushkilon ko araam aajata tha….tanhaiion ko saathi mil jaata tha..Ghum-e-zindgi jub humsafar hojaaye phir safar ka patta nahi chalta….bas humne bhi unhi se yaari karli thi…aur unhon ne humse wada-e-wafa nibhaya bhi..…..khuda ne jub ye majra dekha…thakey mayus zehnon ke andar ek justaju jo abhi baaqi thi, wahi uske nazar-e-iltifat ka baayes ban gaii…Maabud ne apni hikmat ko amli jama pehnaya…..
April ki ek subah itni karishmati hogi kisey khabar thi…mehmanon ko lene station jana tha…us waqt ye kahaan jaante they ke aaj ka ye din sunehre hurfon se likha jaa chuka hai..aaj ka ye din ek gumnaam dil ko koii nisbat bakhshne waala hai..aur vo nisabat….ek aisa baab likhne waali thi jiska unwaan khud khuda ne chuna tha.
Mehmanon ke humraah ek naya chehra nazar aaya…baa-roub,be-niyaaz,pu-rwiqaar, roshan….us waqt nazar be-hijab na thi, so darun manzar tak rasaai na hosaki....phir bhi adab ka moqam barqarar tha..baad dua salaam un saaheb ko bhi lunch per invite kiya…mere mehmaan unki taraf ba-adab-o-ehtraam jawab-talab nazron se dekhne lage….unhon ne sarsari taur per kaha” insha Allah aayenge” Per Khuda ne chaha aur vo lunch per deegar mehmaanon ke saath hamare ghar tashreef laaye…jub vo hamare ghar may daakhil huye mujhe us subah ka ujaala mazeed roshan hota dikhai diya…us germ dopahar may shabnami thandak shaamil hogaii….aur saakt dilon may ek khushi ki leher uthi…ek aisi khushi jo abadi sakun ki peshin-goii thi. Us din ek be-niyaaz ne dusre be-niyaaz ko niyaaz-mand kar diya …
Unhen sun kar aisa laga goya sama-aten abhi tak apni sama-at ke haq se mehroom theen…Goya unhen jis baazgasht ka intizaar tha vo aaj goonji hai…Vo Jamaal gawah tha ke ye baatin ki dane hai..hum sab bas unhen sunte rahe..achanak unki nazar mujh per padi..us ba-tabbassum nazar may meri talaash ki manzil thi,raah-e-shauq,ishq-e-haqeeqi ki nishan-dahi thi …mai jo ek saada si khud may gum rehne waali abhi tak shahadat-e-karam se mehroom insaan thi..unki nazron se jaise hi nazar mili yaqeen jaaniye vo kya tha ke, ek bijli si dil may kondi…ek kapkapi si rooh per taari hogaii…ji haan jism per nahi…rooh per…khuda gawaah hai ye haqeeqat hai,haq paraston ki jaanib se atta huii hai…haq-parasti ko maslak bana gaii hai…jub saadiq logon ki sohbat nasib hoti hai tou khud bakhud unka sadq gawaah hojata hai us purnoor jazbe ka jo musaaheb ke andar paida hota hai,nashonuma paata hai..phal phul kar phal dene lagta hai..vo phal phir kahin apna beej bote hain..phir kahin ek taanawar shajar oog aata hai…ye ek aisa silsila-e-tabligh hai jahaan lafzon se nahi nigaahon se,roohaani sohbaton se kaam liya jaata hai…jahaan ehsaaas apni manzilen tayye karte hain…
Unki amad ne meri zindgi ka zaviya hi badal kar rakh diya…unki be-loos rahbari ne mujh may ek nai zindgi phoonk di…kal talak safar sirf safar tha,ab zaad-e safar bhi saath hogaya…lihaza jub bhi Allah ke kisi nek bande se mulaqaat ho tou samjh lena chahiye ke sharf Khuda ki taraf se bande ko baar baar bakhsha jaata hai..aur bande ko lamha-e-faiz kub nasib hojaaye ye sirf aur sirf us zaat-e-paak ki marzi per munhasar hai.
Sawera hone ko hai..bas po phatne hi waali hai...vo kaali siyaah raat chat rahi hai.asmaan apne ujale sametne ko betaab dikhai deta hai.nerm howa ke jhonke koi baat suanana chahte hain.koi sune bhi..ye khubsurat parinde apni udaan per kitne masrur hain.aur rab ka shukur ada kar rahe hain apni chachahat se...ke unhen par mile perwaaz mili.aur un nhanne munne parindon ki nazron may ye duniya bilkul ek anaaj ka daana thi.jiske liye unhen koi tag-o-dud nahi karna thi.bas jub ji chaha unki dastaras may tha ye daana..suraj bas apni kiranen bikherne hi waala hai.shab bhar ki khamoshi apni kasalmandii utar phenkne ko beqarar hai.aur vo raha chaand pyaara...usey jana kahaan hai..vo bas raat bhar ki sangaton ki daastan khud may samaye muzmahal sa tak raha hai ke mere dosto ab tumhari baari hai...maine apni nibha daali...taaron ki ankhmicholi reh reh kar yaad arahi thi usey...sare jahaan ki hairaton ka wahed jawaab hai kainaat ka kaarsaz...uske anginat pehlu..uski lazwaal rehmat..aah..shab ki intiha dekhi..subha ki ibtida hai ab..
jaari rahega.. -------------------
Dusri qist -------------------
Kitne mah-o-saal is subah ko tarsa hai dil…kitne shab-o-roz ghaflaton may guzaar diye….kitni shaamen uljhanon ki nazar kardeen..kitni subahen shamsi na hosakeen….aaj badi muddat ke baad is fajar se nazar mili hai….is haseen ujle asmaan tale khud ko pursukun paaya hai….hmmmmm isi sakun ki chah may dilon dilon bhatka tha dil…baad muddat ke patta chala jahaan ye mila vo apna tha dil….aaj ki suhani subah keh rahi hai aaj tujh per khuda meherbaan hua hai…barson se sawaal bani zindgi ka khud jawaab ban gaya hai…hmmm is se behter kya hosakta hai.ke khuda bande se khud kehde meri atta kya hai..itne din tune khud may nahi dekha khuda kya hai.zoha ki dabi dabi in muskurahaton may bhi wahi tou simat aaya hai…jub bhi ek perda serkta naya ehsaas koi milta..aur dil-o-zehen may roshni si phailti huii kya hai….wahi tou hai…jisne apni atta ko mukhtalif waseele bakhshe…aur ek murda dil may zindgi phunkne ka zimma unhen bakhsha…..isi tehreek ko hi tou marifat kehte hain….uski pehchaan aam nahi….vo un khaas nazron ka tohfa hai…jinke zimme ye kaam sonpa gaya hai…jo ehsaas ban kar dilon may milte hain….jinhen mil gaye unke dil phir kisi subah ke kisi ujale ke mohtaj nahi rehte….roshani ka safar…shuru hojaata hai….
Zoha ne likhte likhte ser uthaya…..ya Allah..usey apna wada yaad aaya….jo usne khud se kiya tha…ab koi subah adhuri nahi hogi..ab her subah se uski mulaqat rahegi…suraj ki pehli kiran se nazar milane ki tamanna ka maqsad sirf ek raha…saari duniya may roshani bikherta hua ye uski nazron ko bhi tou chum kar aaya hai…un nazron se hi tou zindgi mili hai…unhi se mulaqat ka waada hai ye subah….ye her naii subah….ye khubsurat sunehri subah…. jaari hai.....
Ummid yaqeen se juda hua jazba hai..gar yaqeen na ho tou ummid kahaan…vo kehte hain na ummid-o-beem ki halaath ...is kasmaksh may banda na idher ka rehta hai na udher ka…so gar ummid ka daman thaame rakhna ho tou pehle apne yaqeen ko mazbut karna hoga….pas-o-pesh may pade huye jazbaat raah bhatka jaate hain.ummid ki pehli seedhi mohabbat hai…..dusri yaqeen…..mohabbat karne wala dil hazar badgumanion ke bawajud yaqeen ko thaame rakhta hai…ummid ka safar karta hai….ye bhi kuch aise hi dilon ka fasana hai….jinhen zamaane ne sab kuch diya is ek yaqeen ke siwa….her nazar adakar..her rishta stage ……her zubaan dorangi…her lafz masnawi….ek aisa hi drama hai zindgi…..yehaan ache achon ko stage per paaya hai..jinse samaaji iqtedaron ki bagdor sanbhalne ki ummid thi…vo bhi is stage per nazar aane lage hain….banda sada se khuda ke karam ka mutlashi…in gumraah dilon may hidayet ki kiran khojta…mayusion may dubta…kabhi na khatam hone wale intizaar ka safar jaari rakhta hua….us ummid ki taraf dekhe jaata hai jiski buniyaadi haqeeqat bas itni hai….ummid ke liye kyon talaash kare tu kisi ka dil…koii nazar….gar ummid ka matlab jaanta hai dil…tu banjaa ummid ka nishaan…koii aisa jahaan…jahaan markaz ummid ka rahe tera hi dil…..gar aisa hogaya…..tou jaan le tujhe tera yaqeen mil gaya…tere hausle hojayenge jawaan…teri ummiden ban jaayengi sab ki ummidon ka jahaan….sirf chahne se gar koi baat banti agar…tere ghar pe hi mil jaate tujhe charagarh….do qadam tou badha..kuch door chal tou sahi…ek charagh tou jala…khud ko bhul jaa…dekh jabaja…kitne charagh jal uthey…ek ummid ka dia…tujhe roshan kar hi gaya……
ilaahii kamayabii rahnuma ho koii ummiid-vaaraana chala hai
Ye khush-mizaaj khush-rang gul kya keh rahe hain..dil tak paighaam kaise pahunche….jub ke yaadon may tak koi gul nahi hai..sab khaar hi khaar biche hain jaa baja…unhi ko gul maan kar hi tou qadam rakha tha…ab lahu kahaan kahaan se rasta raha kise khabar thi…paun tou bas apni raah per they..unhen to hai sirf chalna….dil ke band derwaze per jo dastak sunaii di…najane kya kya manzar dikhaye….mosamon ka aana jaana..in khushrang gulon ka itrana….lamhaati husn se arasta-o-pairasta waqt, kya tamaam dilon ko eksi khushi degaya ? khilkhilata ye mosam halaath ke tufaan se kitna be-khabar aur be-khauf tha….shaadabion per jub shabaab aata hai tou shaayed aisa hi alam hota hai…
Sabaa kho si gai in gulon ko chu kar…in ke anokhe ehsaas may kho kar…kitni tamaniyet bakhsh hai is lamha zindgi..jub mere haath inhen mehsus karte hain…ye husn zindgi ka samjha rahe hain…ye rang zindgi may bhar rahe hain..usne kitaab kholi..waan bhi ek gul tha…murjha kar bhi rang de raha tha…yaadon ka haseen pal…yehi rang uska gawah bhi…
Daanish hairanion ka ek aisa pal tha jo kabhi tamaam na ho saka…uski muskurati ankhen…uski roshan peshaani mashur kar gaii sabaa ko…aur vo kisi seher-zada ki tarha uske dil ke peeche holi thi…apna dil bhula baithi..bas usi ko khud may sada dhadakte dekha tha usne….Daanish uski kaifiyet se lutf-andoz hota…ye tayeshuda taqdeer ka lamha tha jo sabaa ki zindgi per chaa gaya….Daanish….tum kaun ho aakhir?
Ek mazhabi taqreeb may sabaa Daanish se mili….aur usne Daanish ko suna..bas useey sunti hi rahi…uske khayaalath itne khubsurat they ke zehen o-dil per chaspaan hogaye….phir pata nahi kub vo khud se bekhabar hui…jahaan khuda ko sunne lagta hai admi..wahaan aisa hi samaa hota hai…bas usne khuda ko suna…aur sunaane wale ne khuda ki mohabbat ke sath saath apni mohabbat may bhi rang liya…aur sabaa ki kaifiyet khud sabaa ke ekhtiaar may nahi thi…
"Sabaa..tumhara dil na tute isliye mai khamosh raha….mai tumhari mohabbat ka ehtraam karta hun…magar mai majboor hun…mai inkaari nahi hun is jazbe se jo tum se ho kar mujh se bhi guzra hai…magar socho..haasil ki ummid kahin ka na rakhegi..mohabbat misl-e-gul hai bas mehakti hai..mosamon ki tarha saath rehti hai..kitabon may gul ki tarha dil may mehfuz hojati hai…her mohabbat ka anjaam gulshan nahi hota..kabhi ye veranon ki bhi zeenath hai…magar mohabbat ek atal haqeeqat hai..jub kabhi gulon ke raaste se guzro ye yaad kar lena…mai inhi gulon ka ehsaas hun jo dilon ko milta hun….mai khud ke liye nahi khilta..mai in gulon may khilta hun"….
Mosamon ki tarha us se mulaqaaten raheen…tanhaii may bhi sirf uski baaten raheen….gulon se mohabbat pehle bhi thi…ab aqqdat hogaii..ab mosam-e-gul se sabaa ko mohabbat hogaii…ke vo inhi may tou shaamil tha…inhi may hai maujud….hawa usi ka paighaam laati thi..gulon may us ki mahak se milaati thi….hissiyaat ka daras they ye gul…
Sabaa….tum zindgi ka daras lo in gulon se…daras do un sabhi ko jo sirf apne liye hi khilte hain…jo kabhi kisi ko nahi milte….tum baras jaana bahaar ki tarha us dil per…jisne bahaaron ko sirf khwabon may dekha ho….tum gulshan hojana us dil ka jo gulon ke lams ko tarsa ho….ye ahaata-e-chaman dilon ki hadd hai…ye sehn-e-chaman tumhari kasoti hai..ye pholon ki kyaari tumhare karam ka phal hai…tum in sab se khubsurat ho…tum her dil ki zarurat ho..raaz-e-mohabbat jisne bhi samjha unhi ke hisse may ye gulistaan aaya…
Asmaan bhi wahi tha zameen bhi wahi…Aas paas bikhre huye halath bhi wahi….bas dil ke mosam badal gaye they…vo din khwab hogaye jub her choti si choti khushi ka intizaar ragon may bijliyaan dauda deta tha…saara aalam haseen lagta tha….
Edden kitni ayeen guzar gayeen…aur yaadon ke siwa kuch na bacha…ab ke baras bhi ye aai hai…haan mauqa hai aur ezaaz bhi…ke Rab e kareem ne her fale may ek fazilet rakhi hai..ab ke bhi ye ayegi chup chaap guzar jaayegi…..bas vo hi dil may dhadkega…khayal hi uska eed ka sabab hoga…edd ki sachi khushi us waqt hogi jub amal ko haqeeqi jama pehnaya jaayega..
Dil tou yehi chahta hai ye sauda ye junun rang laaye aur karam hojaye….amal ki rahon may banda surkhuru hojaye..meri tamanna bhi yehi kehti hai ab ke mera daman sache sitaron se damke…vo khushi jo karam ka natija ho haasil hojaye….
Hazaron khahishen aisi hain jin se agar qurbani mangi jaye tou mangne wale ko khatam karden..magar karam ka takhaza yehi tha ke haqeeqi khushi pehchani jaaye…jo dusron ko khushi dekar milti hai…yehi admiyet ki pehchaan hai…saare lawazimaat nasib hote hai magar dil bechain rehta hai..ye ishara hai adhe adhure insanon ko takmil ki jaanib modne ka….ke aye basher tu sirf tera nahi mera bhi hai…mere liye hai…aaa paana hai agar mujh ko meri rahon may aa…tera qadam gar mere liye uthe tou mai her qadam per tera hun..aur teri manzil tujh may hi hai…mai kub tujh se juda hun… jo tujh may hai mai wahi khuda hun..
Lamhe kub din bane din kub saal…in mah o saal may waqt ka her sabaq dilnasheen hogaya…sachi khushi ka matlab samjha gaya koii…zindgi kub tehrne deti hai…so guzarti rahi…aur mai apne safar may khud ko bahut kum mili…sab ki rahi…ab sab is wajud ko faramosh karchuke us ke siwa….jo rag e jaan may hai…uski nazar her lamha mujh per…meri chahton ki taraf…meri daud ki taraf…haan ab mai keh sakti hun jub mud kar dekhti hun…mujhe mili thi vo…..mujh may shaamil thi….vo her tabassum may roshan thi …hmmmmm aji wahi sachi khushi….
Likhte likhte saara ruk gaii…abhi kitna kuch baakhi hai..zindgi ne ab tak vo karwaya jo ferz tha…ab tou vo karna hai jo begharz ho….ferz aur gharz donon ka choli daman ka saath hai….her taraf ek ummid ki faseel thi..dil bas khwab may mahu tha...arzu ki hadon se nikal kar dekha to mayus kaii nigahen dikhaii deen…jo chaandni may bhi tareek theen…kya unka ujala ban sakti hun mai….shayed …koshish tou kar dekhun…tab kahin jaa kar mulaqat hogi….sachi khushi…se….wahi naveed eed hogi….
Pannon ne jub sab apne seene may samo liya…qalam ki yaseeyet phir bhi baakhi rahi....sara ki khaali ankhon may jhilmilate kurb ka samna karne ki taqat unme bhi nahi thi…phir bhi ek hausla abhi baakhi tha…hai aur rahega….dil ko vo kar guzarne ka armaan hai jo mere “muneeb” ko pasand hai…itbaa ka rasta dikhane wali babarkat hasti ki khushnudi may chupi hai khaalikh ki raza….so yehi haasil karne ka armaan hai…saara ke seene se ek tamaniyet se labrez saans azad huii…
zindgi kya hai ek ehsaas ke siwa...warna is duniya may koii dilkashi kahaan..gar bashar ko dil na mila hota...yon mehbub ki khatir rab bhi na jala hota...mohabbat ehsaas hi tou hai..aur dil ehsaas ki panahgah...so mehbub ko dil de kar mohabbat bada pareshaan huii...meraaj bhi ek baar hi hisse may aai hijr ke maare ke...ye daras adam ko mile hain rab se..ye daur milta hai zindgi may ekbar sab se..vasal se haseen hain hijr may panapte ehsaasath...yehin shaur ka safar shuru ...yehin chah ki her maang fana hoti hai..derd jub raah e junun se guzre apna husn nazar aaye usko...derd sa haseen koii nahii....zindgi ke her mod per saath chalta hai...apne may hi milta hai..apnon se hi milta hai....so aye dil nigaahen chaar kar...is se....sawaal hazar kar is se...jawab bas wahi aayega...jaan kar tu ek aur derd paayega...ke shaur ka her mod tujhe intizaar ki saubaton ka matlab samjhayega....ummid ki raahon se bhatka le jayega....ke chal us jagah...jahaan...koii aas na bache baaqi...koii ummid na rahe baaqi....na koii arz zid per uter aaye...na koii tamanaa kahin machal jaaye....ek ehsaas ke siwa sab fana hojaye...nesti derd se zyada kaifageen lage.....us moqam per dil pahunch jaaye...tab itna samjh lena....ke tumhen raah e mohabbat mil gaii hai....zindgi .....
sabr o qarar ka dawa.....ahad o paimaan ki takrar.....iqrar ki luzzat.....meherbaan ki ek nazar.....in sab se ghaafil karde ....tab itna samjh lena....sab kuch mila hai ek khud ke khojane ke baaad...kahin koii naam tak nahi.....uski yaad aane ke baad...ek dil ke jaane ke baad...zaat ka ehsaas jub talak baaqi vasal ka amkaan nahi....aaj paaya hai ye raaz ke haan mohabbat tou bas usne ki hai....jub mohabbat apni haqeeqat se ashna karde.....aur faslon ko motbar karde...paighaam ko rahbar karde.....sohbat ka nasha hijr may paaye...vasal may dono alaam se begaana hojaye...yehaan tak ke mehbub bhi nazar na aaye....dono ki zaat ek dusre may yon madgham ho ke bas wahi ek hi nazar aaye....uski hasti may gar khud ko khoye...usko hi aye ishq tu paaye....ye ehsaas bhi mile hain us se....inko kaun samjhaye.....nazara gar chahe....apni hasti se begana hoja...derd se anjana hoja...bas tu deewana hojaa......
jisey maye ki chah hai madhoshi ki chah hai...vo jaaye us gali jahaan vo nazar sab ko mili.....jaam e mohabbat ek bund ban gaya....ek ek bund ka nasha, lagta hai maikada.....maikash ka hosh lejaye dilruba....sarmasti may jhum kar dil dar-o-deewar se uske lipat lipat jaaye...uski muskurahat apne lubon per sajaaye...dil uske qadmon may jhukta jaaye.....daman ki hawa se aram zara paaye.....phir taaumr zindgi tujhe hosh na aaye......tu verd mohabbat ka ban jaaye.....
Salamat raho….ek tumse hi tou jahaan mera qayam hai…ek tum ne hi bhare hain rang sabhi zindgi ke khakon may….ek khwab jawan hai ankhon may…ek ummid rawan hai ankhon may…mujhko yaqeen tha .ekdin vo mujh ko sun hi lega….itna dhuan hai meri ahon may…aye dost mere tum shahid rahna….meri rudad apni zubani kehna….sada tumne meri suni…kabhi apni bhi kehna….kitne khaali chehron per shafaq bikheri hai tumne…kitne soye dilon may koii raag jagaya hai tumne…kitne khaali jismon ko ehsaas dilaya hai tumne…kya hua gar kuch paas nahi…ab aisa bhi nahi ke kahin koi aas nahi…itna samjhlo ek tumhare dil ke siwa aur koii khaas nahi…..aao meri duniya may jo chaho vo tumhara hai….ek haqeeqat ke siwa sab kuch yehaan pyaara hai…ye khayalon ki haseen nagri hai…..inka her dil dost jigri hai…..kyon na kuch der tum bhi sustalo….mehafil mehafil kahin na ukhtalo….kuch der teher jao..kahin koii tumhari janib lapke hai…kahin gar tum na uske haath aao…mar na jaaye aks koi mubham,chut na jaaye chahton ka kohra bhi….bikher na jaaye khwabon ka pehra bhi…jis simt nazar uthti hai tumko hi paati hun.tumse hi tou dil ki baat batati hun….ek darkhwast aur meri hai tumse..gar koi dil khamosh mile..anjan nadan samjhna na tum..arzu chup tou hai per dil may rehti hai…vo khud se darte darte tumse tak na kehti hai….ab tumko usme ghar karna hai…aas ka koii lamha muater karna hai….maine dekhe hain satrangi sapne…jahaan na they door door tak apne…tab tumne ek khaka banaya tha…usko maan kar maine apna apne dil may basaya tha….lamha lamha tumse milte milte is khaake may lahu apna bhar kar is ko zinagi kar kar….mai ye bhul gaii ye tou mahaz khaake hain jo tumne banaye hain...dil tou dil hai aakhir….behel kar machalta hai…gir gir kar sanbhalta hai….ek ehsaan hai tumhara mujh per…tumne her baar thama hai mujhko..tumhare kandhon per apna saara bojh rakha…..tumko bhi rula baithi hun mai…..tum bhi ghabra kar is shiddat se…mujh se juda na hojana….is junun ki manzil koii nahi…is ishq ka koii haasil nahi…is darya ka koii saahil nahi…..jo isme duba vo aaqil nahi….zehen ki takrar alag hi thi…dil tou bahar ka her manzar bhul gaya…ander jitne rang mile unse ek naya rang chuna….us rang may khud ko rang gaya….baaqi sab ab paraya hai…ek ye rang jo haath aaya hai jo tumhara saaya hai…..bas mujhe tumse itna kehna hai….chahe saara jug chute tumhen hamen saath hi rehna hai…
EK nai zindagi ki takhliqh karne wali Khuda ke nizam ko ek aur rukan dene wali hazar saubaton ke baawajud pyaar lutane wali maa ke siwa aur kaun ho sakti hai.is haqeeqat ko dilruba se zyada kaun jaan sakta tha.
Vo qayamat ka din tha jab dilruba ki paidaish ke theek ek haftey baad uski maa ka intikhal hogaya tha.shabaz ki tadap dekhi nahin jaati thi.yeh gham kabhi bat saka hai ? dilruba ko dekh dekh kar uski haalat aur kharab hone lagti.ab kya hoga kaun sanbhalega is nahnni si jaan ko?maa kahan se laoonga my iske liye? shabaz ko aakhir ghum chpana aahi gaya.waqt ne kab kisi ko itni muhallat di hai ke peechey chutne wale lamhon ko sameta jasake.
Nahanni dilruba apni taaimaa ke ghar palne lagi.shabaz ne doosri shadi karli..doosri biwi sharton par aayi thi.ladki apne taayi ke ghar hi rahegi.shabaz bhi aakhir ek kamzor mard nikla ek baap ka farz bhula kar nai biwi ke husn o shabab mey kho gaya.uski biwi ka bhi kya khusoor ? vo jawan thi uski bhi aarzooyen theen apne bachche apna ghar.apni saut ki bachchi se lagao kaise hosakta tha use ? uske liye khud se ooper uthna padta use.yeh har kisi ke bas ki baat kahan?Khuda aazmaish ke kade din dikhata hai insaan ko.uske bhi ajab khel hain.vo cheenta hai to cheenta chala jaata hai aur dene pe aata hai to chaper phad kar deta chala jaata hai.yehi haal tha yehan bhi.
Waqt guzarta gaya.dilruba badi hokar khub nikhar gayithi.aur duniya ko samajhne lagi thi.in guzarte saalon mey dilruba ne jaan liya tha ke maa ab kabhi na mil sakegi aur raha baap to vo kabhi uska tha hi nahin.taayi ke ghar ka mahol ne uski nifrat ko hawa dedi..
Aaj chutti ka din tha shabaz ko dilruba ki achanak yaad aayi.itne dino baad vo ghar par maujood tha.warna hamesha karobar ke silsile mey mahino pardes mey guzar jaate.aur ghar aata to kasalmandi door karne mey waqt guzarta.dilriba ko uske hisse ka pyaar mil hi na saka. Kyon ki is beech shabaz ke do ladke aur paida hogaye they.aur shabaz ab do chakki ke paaton mey pis raha tha.dilruba jin haton mey pal rahi thi vo khudaye khudus ka badtareen namuna they.ek maa ki aulad hote huye bhi unhin is baat ka ehsas na tha ke vo jo nafrat ka beej dilruba kay seeney mey bo rahe hain uska phal apne bhai ko hi bhugatna padega.jo nafrat phalegi phulegi vo unki bhai ki ladki ko hi khajayegi.suna tha ke paalne wale ki mohabbat zyada hoti hai janam dene wale sey.magar vo saari mohabbaten bech kar kha gaye they.dilruba ki baghawat me uske valid ki laparvahi bhi shaamil thi.aur kuch dastoor-e-zamana bhi khusoor-var tha.
Shabaz ko ab shiddat se is baat ka ehsaas hone laga tha ke uski beti us se nadansta taur par door hoti jaarahi hai.usey kisi na kisi bahaney se khareeb laney ki koshish karni chahiye.ye bhi Khuda ki taraf se ishara tha.shabaz dilruba ko ghar le aata.vo aati to miyan biwi mey kisi na kisi baat par jung chid jaati aur bachche seham jaate.isi tarha mah-o-saal guzarte rahe aur bachchon ko in baton ki aadat padti gayi.aur in ke darmiyan fasla badta gaya.doosri biwi ke bachchon ko is baat ka ehsas tha ke is nahnni si ladki ke aate hi maa baap mey jhagde shuru hojate hain.so unhon ne saare fasad ki jad usi ko samajh kar us se kinara kar liya.dilruba ko kahan kisi ki parwa thi.use to bas apne baap se kaam tha. Apni zaruraten puri karwati aur taaima ke ghar chali jaati.wahan use puri aazadi thi jo chahe kare jhan marzi ho jaaye aaye.maa baap kahan they fikr karne ko.bahar haal sab ne milkar ek bin maa ki bachchi ko ghalat raah par dal diya.
Shabaz achanak ek din apne bhai ke ghar gaya.dekha to dilruba ghar par nahi hai.usne hungama khada kar diya.bhabhi ko khub khari khoti sunayi.bhabhi ke paas koyi jawab nahin tha, kyon ke yeh unhi ke laad pyaar ka natija tha.ke dilruba man mani karne lagi thi.unhon ne apni ghalati chupane ke liya shabaz ko uski khudgharziyon ki yaad dilayi.shabaz har tarf se bebas tha ab.beti ko sanbhal na saka.bas gham lag gaya use.uski zindagi daurahe par khadi thi.ek taraf bin maa ki bachchi haat se nikli jaa rahi thi , aur doosrey uski doosri biwi ne aaj tak dilruba ko khabul nahi kiya tha.
Dilruba ne college join karliya tha.bus phir kya tha uski aazad tabiyat ko par lag gaye.vo zameen par kahan rukne wali thi.shikari to bas uski parwaz ke muntazar they,aur nadan na-samajh dilruba ise bhi zindagi ka tajruba samajh kar aage badhti rahi.shabaz ko dilruba ki be-raah-ravi ki khabar milti to vo samjhane lagta aur dilruba ro dho kar use kamzor kar deti.bin maa ka hona uske liye dhal banta chala gaya.agar maa zinda hoti to palkon me chupa kar rakhti zamane ki oonch neech samjhati.sab ki zuban par khudgharziyon ke taale pade huye they.
Dilruba ne pdhayi khatam karke naukri karli aur shabaz ko khabar mili dilruba aksar kisi ladke ke saath dekhi gayi hai .shabaz ney lakh samjhane ki koshish ki.use haseen khwab dikhlaaye jo usne beti ke liye dekhe the.dilruba ka yakheen to kab ka toot chukka tha.ek din khabar mili dilruba ne usi ladke se shaadi karli .shabaz neem pagal hogaya.vo ladka kisi etabar se bhi dilruba ke qaabil nahi tha.dilruba ne apne baap ko uski laa-parwaiyon ki saza dedi thi.aur khud ko bhi .ek na-aakhibat andesh mard jo baap ka farz ada na kar saka uska yehi hasher hona tha.ek maa ke na hone se dilruba ek accha khushgawar mustaqbal ganwa baithi.ab zindagi bhar ke matam ke siwa shabaz ke paas kya rah gaya tha.
Train musafiron se khachakhach bhari huyi thi...platform par chalna dobhar ho raha tha...Ghazala hairan pareshan idhar se udhar ho rahi thi...achanak safar ka program bana tha...isliya reservetion ka to sawal hi nahi uthta...phir aisi halat mey to yeh hona hi tha...na idhar key rahe na udhar ke waala mamla tha....
Usi waqt railway police man farishta ban kar pahuncha aur apni khimti raaye se nawaztey huye kaha"kisi bhi dibbe mey chad jaiye bad mey dekha jayega.......aur koyi chara bhi to nahi tha.so Allah ka naam lekar chad hi gayi vo.
Dabbe mey sawaar hone ke baad hi pata chala ke kitni shaandar ghalti huyi hai....kyonki dabba labalab tha...vo shor- o -ghul macha tha ke bas..s.ab apni apni seeton ki talaash may they....kisi ko kya parwa thi ke ek koi pareshani may hai.
Aisey mey kisi ne pukara."suniye .yehan baith jaaiye. Ghazala ne mud kar dekha koyi student tha jo apni aadhi seat offer kar raha tha...ghazala ghanimat jan kar tik gayi seat par...
Pura dabba students se bhara tha...shayed koyi collage trip tha....dhama chokdi machi huyi thi...aur yeh hungama use accha lag raha tha...kaafi dinon baad itna gulzar mahol dekhne ko mila tha....befikri ke ye rang uski zindagi mey ankha they.
Ghazala sharmayi simti huyi baithi thi....kab aise haalat se sabikha pada tha....khuda ka karam tha jo itni bhi jaga milgayi....koyi meharban to mila warna kaun kahan kisi ko poochta hai is afratafri mey....
Vo ladka na jane kab se ghazala ko ektak dekhe jaraha tha...hairan o pareshan khubsurat si yeh ladki kitni anokhi lag rahi thi.s..ab se juda sab se alag....uski madhbhari ankhon mey kitni kahaniyan chupi theen...uske khubsurat hont saari daastan seene mein dabaye ek bekaran khamushi liye sitam dha rahe they....us ladke ko na jaane kyon vo apni si lagi thi....bheed mey najane kaun kaun uska lams pana chahata tha...isiliye usey hifazat se apne paas jaga dedi thi....aur is tarha takhriban uspar apna haq jamaliya tha.
Ghazala ne use muskura kar thanks kaha...tabhi usne dekha us ladke ko ghaur sey ..vo najane kyon ajnabi nahi laga use....ladke ne apna naam amar bataya....aur baaton baaton mey ghazala ko pata hi nahi chala ke ye kaunsi daastan cheed gayi hai....us ajnabi ladke ne use bolne par majboor kar diya tha....warna safar ki mulakhaton mey usne kisi se itni baaten nahi ki theen....us ladke ne pasandeedgi ki saari haden paar karleen....
Jo daastan barson se adhuri rahi jiska koyi unwaan bhi na tha aur anjam namalum....uski zuban se nikla har lafz use ghussa dilane ki bajaye hairan karta chala gaya...sach poochiye to shaad karta chala gaya .uske pyase dil ki pyaas bhadak uthi...uske bekhauf jazbon ne ghazala ko bhi apni lapet mey leliya tha....
Na jaane kyon vo apna sa laga...aur is apnaiyet ki wajah mehsus karne se bhi peshter vo bas apna hota chala gaya....baaton baaton mey usne Ghazala ke saare dard malum karliye...Ghazala jaisi sober ladki jisne kabhi kisi se dil ki nahi kahi thi....jaane vo kab kaise dil ke itne khareeb pahunch gaya tha....
Jo aaj tak na ho saka tha vo aaj hogaya tha...havason pe bijliyan girana padha tha aaj mahsus bhi karliya....yeh ishq hai hi aisa aatishi ke aankhon se paani ,dil mein dhuan, aur jism se chingariyan sulgaane lagta hai...aan-e-vaahid me zindagi badal gayi thi.
Ghazala ne hamesha ki tarha hont si liye...is baar bhi dil ki dil me hi rahi...sharm-o-haya ne hamesha uske khadam rokey they.....aaj bhi wahi is toofan ke liye baandh saabit huye....warna vo to usey baha legaya tha....usne in chund ghanton ke safar mey uski saari tishnagi mita di....vo jo nazar aaraha tha kahin nazar ka dhoka to nahin tha....ye kaun mil gaya tha..aur usey hi kyon...kitne sawaal arzu ban chuke they..
Safar khatam hone ko tha. na koyi ahad-o-paiman huye.....na mustakhbal ka koyi khwab tha...bas ehsaas tha to sirf judayi ke gham ka....jo kabhi kisi safar mey nahin hua tha....
Uska station aagaya tha...us ladke ne apni aankhen chupa leen...churaa li keh nahi sakti thi vo...koi ilzaam dene ko dil nahi chaha....yeh bhi tou mohabbat ki hi rasam hai...dil jisey chahe,usey apni tamaamtar bulandiyaan bakhsh deta hai...
Ghazala ne khuda hafeez kehte huye socha kaash ye safar khatam na hota....itna bharapura station veeran laga usey....vo dabbe se utri ,yeh uski zindagi ki sab se haseen aur bojhal shaam thi....
Paakar bhi na paane ka ehsaas ,ek aisa tajruba hai zindgi ka jis se guzar kar her khubsurat pal ko mehfuz kar leta hai dil...
Aur yehi tashnagi tou derd ban kar dua hogai...hmmm in behlavon ke bawajud dil ko samjha na saki thi vo....
Zindagi mein acchanak tufaan ki tarha aaya tha vo...use sanmbhalne ka maukha hi na mil saka na shaur ki aankhen kholne ka...use ye bhi khayal na raha ke samaaj mey uska kya mukham hai vo kisi ghar ki fard thi...sab kuch bhula diya us deewane ne...
Bekhudi ka ye ehsaas jaan leva saabit hua....
Aaj jab socha to use hansi bhi aayee ke yeh to laalach hai paane ka....kya ye kaafi nahin tha uske liye ke uska dil chahne aur chahe jaane ke maraahel se guzra hai....
Aaj bhi koyi uske liye deewana ho sakta hai...kisi ne kabhi khul kar uske jazbat nahin baante they aaj tak...koyi saath nahi dhadka tha....
haaye,kyon aaye tum meri zindagi mein? vo pyaas jo dab gayi thi, vo aas jo dam tod gayi, thi vo khwaab jo tut gaye they ,vo zindagi jo kho gayi thi ,vo dil jo khamosh ho chuka tha,aaj phir se use apni meharumiyon ka shiddat se ehsaas dila raha tha.
Aaj mosam pe phir se jawani aayi thi…bekhaber angdaiyaan khayamat se kam nahi theen…achanak boonda bandi bhi shuru hogai….ye mosam bhi bheeg gaya tha uske dil ki tarha …ye mosam use bahut pasand tha…।
Aaj uski ankhon may nami kijagha khawbon ne leli……vo khwab na jaane kab se taras rahe the uski veeran ankhon may sama jane ko…..usey darr lagne laga tha in khwabon se….kyon ke ye usey kabhi bhi raas nahi aaye they….
Us haseen safer ke baad ghazala ki zindagi badal gai thi…..ab vo na zindon may shumaar thi na murdon may…..aur raat din ankhon se wahi behta tha jo rag rag may sama gaya tha…..jo bhulaye nahi bhulta tha….vo pal javeedan hogaye they…aur vo unhen bade pyaar se sanbhale huye thi………..sab se chupa ke………aisa kyon hota hai kisi mohabbat bhare dil ke saath…..shayed mohabbat aandhi ki tarha hi aati hai zindagi may……
Ghazala ne asmaan ki taraf dekha..goya khuda se kuch poochna chahati ho…Maula.mujhe meri mohabbat baksh kyon nahi deta…kya mujhe chahne chahe jaane ka haq nahi….ab jo bhi mila teri hi to marzi thi…to phir ye dard kyon…….ek inbisaath ka lamha kyon nahi…..kab mile hain ye jawab jo aaj milte usey….waqt ke saath bahti rahi vo………
Achanak khuda ko us per taras aagaya……………
jise dhunda gali gali vo tere astan may tha .
mere mehboob ka zikr teri dastan may tha
Vo ek din achanak aise mila jaise pyaasey ko saawan………jaise tadap ko kharar……………vo meri zindagi may baras gaya…………..jo socha na tha vo hogaya tha………………faasilon ka matlab badal gaya....ek aisa khurb haasil hua jis may judai ka koi amkaan nahi…..abdi khushi baksh gaya vo……un thaki hui ankhon ka saara intizaar ek haseen kahani ban gaya…..
Aah……ajab kahani hai, jo betaabiyon ki zubaani hai…aaj jana ishq hota kya hai..paana kis ko kehte hain……dil may basna aur basaa lena ek aisi taabir ban gaya jiska her rukh roshan tha……………
Mere mehboob ka jalwa ankhon may aisa samaya ke phir kisi ke deedar ki hasrat baakhi na rahi………aur ek vo zindagi shuru hui jahan surur hi surur tha…..yaadon ke un palon ka jo dil may guzarne lage…….aur sabse badi baat yeh thi ke Usey ghazala k ek ek ansoo ki khabar thi, uski saari tadap se ba-khaber tha vo….ye kaafi tha uski rooh ki aasudgi ke liye…………..
“Wafa jub zanjeer lage tou phir her vo rishta bemaani jisme atut bandhan ki talaash ho…haan kabhi wafa khud zanjeer na banna chahe tou baat alag hai…baaz dafa halaath aur jazbaat saath nahi chalte….dil chahe miljaayen raaste nahi milte….ye rasmo riwajon ki duniya…ye qasmon wadon per tika hua her rishta...kabhi kabhi apni kashish kho deta hai..kyonki jahaan sirf aur sirf ek dusre per nazar rakhi jarahi ho.ke aaya kisi ke rawaie may koi tabdili tou nahi…..wahaan yaqeen ki tauheen hoti hai…ye amal wafa ke dayere may nahi aata”….sana ki soch shafaq ko mazeed gehra kar gaii….
“Haan tou phir kya hua.”.shafaq muskuraii…”ranjishen hi sahi kuch tou nibhane ke liye aa….keh hi do”…sana rohansi hogaii…ajab ho tum bhi…”yehaan jaan pe bani hai aur tumhen mazaq sujh raha hai”…yaad aisi ho dil se nikle dil tak pahunche…waqt bada karamad hota hai..nadan ko aaqil bana hi jaata hai…sana sochti rahi…shafaq se tak usne shikwa na kiya…jo ke uski pyari saheli thi...bulki mukhalif ki wakalat karti rhi…aisa nahi hai..yon nahi hosakta..dil ki jo arzu thi ke koi usey bewafa na kahe…mohabbbat hazar bahane dhund hi leti hai..mehefil e yaar may surkhruii ke….kabhi ye shamma ban ke jalti hai kabhi misl e perwana…faqat ek hasrat saath chalti hai …sohbat e yaar nasib ho ke na ho…uski mehafil may ek naam ho apna bhi…ye dhanak rang jazbe isi ki hi tou karamfermaii they..warna koi kya jaane zindgi kahaan se shuru kahan khatam…markaz mohabbatkada…aur waan her lamha milta hai khuda… Sana……ne kahaan socha tha ..uski hansti muskurati zindgi may kabhi koi khamoshi ban ke ayega…aur uski chachahati her dhadkan ko khamosh kar jaayega….uski zindadili tou misaal thi…ghar ke log..sab sakhi saheli saheliyaan…hamesha uski isi ada ke tou gerveda rahe ….sab ko khud may masruf karleti …unka khubsurat waqt thi vo…Haan..ab usi chaand ko gerhan lug gaya tha jo rasm e ulfat ki sada tha…jazbon ki her dalil ka gawah tha….. Kahaan socha tha ke uski ada khuda ko itni pasand ayegi ke usper apna vo karam kardega jo adna ko aala bana deta hai…haan ye mohabbat hi tou hai jo bande ko khaas kar jaati hai..saare sabaq zindgi ke hasil hojate hain..koi dil may chupke se samata hai..koi dil hi dil may kisi ka hojata hai..badi razdari se marahil ulfat ke taye hote hain..na mulaqat hoti hai..na deedar ki hasrat…faqat ek superdgi hoti hai mohabbat..na koi ahad chahe na paiman…koi samjh sake tou samjhe isi may poshida hai imaan…qismat se milta hai mehbub …muhib ke liye vo ek lamha ashiqi ka kaafi hojata hai…bas sana bhi usi lamhe ki zad may aagaii.. Had e sitam tou ye hai ke sitam karne wala hi qarar ban jaata hai..hazaron shikayeton ke bawajud usi pe pyaar aata hai….ye khazana yon hi nahi milta…riyazat o ibadat ek naye rang may milti hai…mazhar hasti ke her ansar se …sana bhi bas aisi hi hogaii…jisne usper nazar daali mafhum mohabbat ka paa liya…kitaab e dil ka panna panna daras ke liye khul gaya… Usne kabhi kaha nahi…kaan apna naam tak sunne ko taraste rahe…ke zubaan se uske ada hokar mai mai hojaun…uski khamoshi ek tanbih thi…ijazat nahi hai mujh ko… faqat wahed ka hun mai…aur vo wahed tu nahi hai…magar usi wahed ki serparasti sada haasil rahegi tujh ko..mai bhi usey hi chahun…teri her chah ko tu bhi usi ki nazar karde….mere aur tere her amal ko aye dil tu surkhuru karde….uski her baat khubsurat thi…aur dil her baat pe uski sada tayyar amalpaira….so sana ka dil ser jhakaye bargah e ishq ki azmaton ki madahsarahi may mahu hogaya….. Aancnh daman tak kabhi na pahunchi…jism zarur jal gaya…magar dil tou amanat hota hai use gazand tak na pahunchi….poshida tha..poshida raha….aur dilbar ko sattar hazar perdon may chupa liya gaya….yaan gar wafaa ka wasta hota zanjeer hi hota…..so aseeri yaan maqsud nahi…bulki asmaani jazbaa azad hi hota hai….uski wassaton may donon jahaan sama sakte hain…..mohabbat kya hai jisne jo samjha usey wahi ban kar mili…aksar daras ban kar…kabhi saza ban ker….kabhi bande ki erteqa ban kar….her surat may ye khubsurat hai…her dil ko iski zarurat hai……isey her dil may mehkne do…sana ko sun kar shafaq …ka dil bhar aaya…”..sana tum khushnasib ho…tumne tou usey paaliya …yehi tou wafa ki had hai …..aur jis khubsurat rishte se bandha hai dil isey kisi zanjeer ki zarurat hi nahi”…………
