Faisla

Tapti garmion may saaye ki tarha ,jhulasti dopeher may anchal ki tarha, khuli chath per Neem ki hawa ki tarha araam deti huii shafeeq si muhafiz hasti hoti hai Maa…Waled tou ghar ke kufaal hotey hain..vo roti kapda makaan jutaane may hi umr sarf kardete hain..

saari vuzaraten tou aurat ka nasib hoti hain..so yaan bhi vazeer-e-khana ne hi saare aham faisley liye..aur sab ko amal paira hone per raazi kiya…vazeer ki nazar mustaqbal se zyada haal ( present) per thi..haal durust karne ke chakkar may mutaqbal ke anginnat mandlaate khatre nigahon se ojhal reh gaye..vuzraati committee ke membaraan ka nakaam ehtejaaj sunwaii tak bhi nahi pahunch paaya…is tarha zindgi ek na-aqibat-andeshi ka shikaar hogaii …teer jub kamaan se nikal jaaye tou phir uska dubara palat aana kahaan mumkin hota hai..usi tarha jazbaati faisla apne efa ke taqaze tale ek naii zindgi ko roshni se pehle andheron se mila gaya..

Bas Shabaz ki zindgi bhi ek aise hi faisle ka shikaar hogaiii..usey apni Maa se behad mohabbat thi..sab ko hoti hai..per shabaz ki mohabbat lazwaal thi be-nazeer thi..usey kya khabar thi..khuda deewane ko derd dekar jub apna banaata hai tou moqadas rishton may mohabbat ki tarha chalak uth-ta hai..vo kahaan nahi milta..vo wahin pe milta hai jahaan uski atta hoti hai…usi tarha naseema ko shabaz apne bete ki surat mil gaya tha…

Naseema musalsal halaath se jung karte karte haar chuki thi.usey apne bachon ki unke mustaqbal ki fikr ne raah bhatkaii..vo bhul gaii ke qader mutlaq ne sabki taqdeer likh rakhi hai..her ek apna nasib lekar hi aata hai..laakh koshish karlo us se zyada nahi milta..magar honi tou hokar rehti hai..so hokar hi rahi..

Shabaz ki jawan umangen, uski kamyaabi, uske jawaan hausle sab ek ghalath faisle ki lappet may aagaye..umr ka vo daur jo intihaii mussaraton ka hota hai, samjhoton ki nazar hogaya..Maa ki door-andeshi qareeb hoti huii azmaish ko na dekh saki..na usey shabaz ki kasmakash dikhaii di..Aan-e-wahed may shabaz ka saara mustaqbal ek junun ki nazar hogaya…aur vo bechara Maa ki ulfat ka maara uff bhi tou na karsaka…

Sabar kamaal zabt ka naam hai..khuda ne mohabbat ka sila sabr rakha..shabaz ne apni zindgi ki her kadi azmaish ko maa ki mohabbat se mansub kiya…aur khud peesta raha..zindgi donon haathon se usey peet-ti rahi…Maa ko khabar na ho saki..per ek ezteraab rehta tha..sab kuch hote huye bhi ek be-sakuni thi jo keh rahi thi ho na ho mera bacha mushkil may hai…

shahar se koson door vo apni shaadishuda zindgi ki ibteda ek neem paagal ladki ke saath karchuka tha..roz kahin na kahin zakhm ke nishaan hote..kabhi chehre per..kabhi dil per…deewangi zawalpazeer hoti bhi tou waqti taur per..phir wahi dhaak ke teen paat waala mamla tha…

jub maa ne ye nazara dekha tou vo ro bhi na saki…na apne ghaath faisle per matam hi karsaki..usey patta chala ab tak jitney ghum uthaaye they usne ,unke saamne ye ghum qayamat tha..jahaan khud apna lakht-e-jigar pis kar reh gaya tha..jis ki khatir umrbhar khwab dekhe,uske khwab be-jaan hogaye..

Naseema ne khuda ke huzur gidgida kar dua maangi” Ya khuda, mai jaisi bhi hun teri hun..aur teri atta meri khata se badi hai…mujhe koii haq nahi tha mere masum saadiq bache ke khwaab apni aankhon se dekhne ka..usey uske khwab miljaate..usey tabir paane ka mauqa nasib hojaata.Magar tune bhi apni hikmaten mere sabaq jaari rakhne they..Bakshde mere bache ki her khushi..uski khushi hai meri khushi..tu chahe tou pathar ko mom karde..tu chahe tou sehra ko chaman karde..tu chahe tou kaafir may imaan bharde…phir kyon na ek musalmaan ko tu musalmaan karde…tere siwa kaun sunega meri...tujhse hi her ummid hai meri..meri arz manzur hojaaye mere Maula..Ameen.

Vo wada nibha raha hai

Mere Ghum utha raha hai

Vo Mujh se meri khatir

Bahut door jaa raha hai

Haqeeqaton Ka Azaab

khwaab ghareeb ka sarmayaa hote hain..jaise pyaase ke liye darya…sehra ke liye nakhal….khwaab ki ahmaiyet un dilon se behter kaun jaan sakta hai jo ek ek khushi ko tarse hon…

Chula band pada tha kub se..Amma lakdion ke intizaar may jali jarahi thi…munna unke paas baitha unka aanchal khinche jaraha tha…Amma bhuk lagi hai…ki rut lagaaye…aur Amma behis shakista chath ghoorey jarahi thi..vo jazbaat se aari chehra apne naqsh-o-nigaar kub ke kho chukka tha…wahaan tou waqt ki sitamzarefi ne apna jaal bun daala tha….honton per jami papdiyaan keh rahi theen, yehaan kabhi koi shikwa koi shikayet nahi ubhri ….inhon ne khamoshi ka zehar chupke chupke pi liya tha…

Suno…munna so gaya kya? Hameed ki awaaz per Amma chaunki…Hamid ki shermsar ankhon se aankhen milaane ki taab usme bhi nahi thi…Haan , bas abhi aankh lagi hai is wadey per ke bas abba aate hi honge..ye kehte huye uka dil bhar aaya..phir bhi zabt apni hadon se tajavaz na karsaka…”Allah ko sab khabar hai”…ye tassali kaafi thi…Hamid karwaten badal badal kar is be-his raat se iltija karta raha ke aye kaash iski subah na ho…mai kaise nazar milaun apne munne ke yaqeen se..uski ummid se…uski bhuk se…per raat ko tou guzarna tha…guzarti rahi…

Ye kya .kitne khushrang phul khile hain apne is chote se mitti ke sehan may..munna maare khushi ke un kyarion se lipat gaya…Amma dekho kitni khushrang titli hai…kitne dinon baad nazar aai hai…uske shukh rang munne ki aankhon may bhi uter aaye they..

Munne ne jhum jhum kar apne kapdon per pyaar se haath phaira…ye nerm kapde badan ko apni ahamiyet samjha rahe they goya…pairon per naye joote muskura rahe they..eksaath itni khushiyaan paa kar munna phule nahi samaa raha tha…Amma ye dekho Amma vo dekho ki bad jari thi…

Amma ki hank sunaii di…Aaja munne..khaana lag gaya hai…munna daud hi tou pada…ye pukaar sunne ko dil taras jo raha tha..khushbu thi ke pagal kiye derahi thi…thaali per jaise tut hi pada tha vo…saans phulne lagi thi uski…itna khaana jo kha liya tha..munne ka nhanna sa pate kahaan aadi tha is sairi ka…Aramda lihaaf ne tou serdi ke maze kara diye…itna nerm-o-gudaaz bistar pakar nind ud jo gai thi..Munne ka dil bhi chah raha tha is raat ki subah na ho…per uski dua bhi qabul na huii..is khwaab ke sang guzar hi gaii ye haseen khwab si raat….

Khwaab

Zindgi hadison se be-khabar hoti hai..aur haadise achanak jagah lete hain aur zindgi eksar badal kar rakh dete hain..Insaan hamesha se hi be-bas hai aur apni taqdeer per uska koii ekhtiyaar nahi hota…Khuda ke siwa aane waale waqt ki khabar kisi ko nahi hoti.her aane waala pal waqt ka rukh kaise badlega kisi ko nahi khabar…her zindgani may ek kahani hai…inhi hadison se janmi…inhi hadison may panapi,inhi hadison ke khaar chunti huii…kabhi ye khaar gulon may bhi tabdeel hojaate hain…magar us se peshter un ki chuban tou sehni hi padhti hai..kuch lahu tou bahega hi…chahe aankhon se chahe jigar se….haan khoon-e-dil may palken dubo kar ek kahani likhi hai ek ladki ne…

Aasifa bhi aam ladkion ki tarha khwab dekhte jawan hui…ghar ki khasta-haali ko inhi khwabon ne hi tou behla rakha tha..warna rona tou her baat per aata tha..school jaate waqt apne libaas per jaise hi nazar padhti tab..apni sahelion ke asuda cheron per nazar padhti tab…rona hi tou aata tha..waled ka mayus chehra ,Maa ki roz roz ki jhak jhak,jo halaath ko lekar hoti thi…bhaiion ki hatdharmi ki ek wajah yehi thi..bigadte halaath se kharab hota hua ghar ka mahol…in sab ke darmyaan ek khwaab hi tou wahed khuhi ka sahara they..tou bas Asifa ko raat ka intizaar hota…andhere may aankhen mund kar khwaab bulaaya karti…ye bulaana hi tout ha…khwaab apni marzi se thodi aate hain…unhen bhi sajaana padhta hai…bas raat aur khayaal aur khwaab…Asifa ke qareebi dost they..

Asifa ne kahan socha tha ke achanak uski shaadi taye hogi..vo bhi aise ke usey rone tak ki muhallat na milegi…vo apni si dugni umr ke ek talaqshuda merd ki dusri biwi ban gaii thi aan ki aan may. jin palon may hawaas chin liye gaye hon wahan waqt ka kahan hisaab hota hai..aur uske baad usey waqt ki khabar hi na rahi.. yon her khwab uski ankhon se noch liya gaya.aur sahi manon may socha jaaye tou khwabon ki haqeeqat samjhaii gaii..aur insaan ki zarurat ka raaz ashkaar kiya gaya..

KHuda ne usey kisi ki khushi ke liye chuna aur vo khushi ban gaii…zindgi ka kaam hai guzar jaana…guzarti rahi…Asifa ki yehi duniya thi..duniyadaari bhi nibhaii usne…sab ke saath jo ghata,uske saath bhi ghata..per ek Asifa abhi tak tanha thi…uska safar shuru hua hi nahi tha..jo usne chaha tha,usne socha tha…

Uske shaam-o-sawere waqt ke pahiyon taley peeste rahe.ye qudrat ka kamaal hi tha ke uske seene may do dil rakhe..ek vo jo duniya ke liye dhadakta tha..dusra vo jo ab tak apni manzil deewanawar dhunde jaaraha tha.najane vo kaunsi ghadi thi…jub khuda ne uski mushkil asaan karne ki sochi..usey is kashmakash se azad karna chaha…Asifa ki kaunsi ada usey pasand aai thi usey hi khabar..warna umrbhar ki bhatkan nasib hoti..ye karam tou khuda ka hi hota hai jo vo apne bande ko uski asli khushi se milwa deta hai..vo khushi jo khud uski zaat may chupi hoti hai…jisey her koii dhund raha hota hai…

Ekdin achanak uski her justaju ka jawaab uske saamne pesh hogaya…vo palken jhapakna bhul gaii…ab aur vo bhi aise…chahna bhi mushkil bhagna bhi mushkil…hont sil gaye..kaatib-e-taqder ne ek kadi azmaish rakhdi uske saamne..farayez aur khwab donon eksaath pesh kiye gaye…khwab keh raha tha zara sa haath badha may tera hun..farayez keh rahe they mai teri umrbhar ki punji hun…kasmakash ne usey thaka diya..yehaan tak ke uske khwab ko usper taras aagaya….vo khwab kub tha.…jo khwab ban kar Asifa ko uski haqeeqat se milwaane ke liye mila tha…khwab khubsurat hote hain..bhale bhi lagte hain…kashish bhi rakhte hain..phir bhi khwab,khwab hi tou hote hain…

Haqeeqat chahe kitni hi chubti hui kyon na ho…per apna husn rakhti hai.hazaron jazbe jude hote hain…in haqeeqaton se…her khwab suhana nahi hota…apne saath bhayanak taabeeren bhi lata hai…ke aankhon ko khwabon ki haqeeqat ka pata jub milta hai..phir koi khwaab baaqi nahi rehta….Asifa ki zindgi ki her be-sakuni ko jawaab mil gaya…

Dosti

Uljhe uljhe rishton ke beech ek shafaf sa rishta,

Baghair kisi ummid-o-talab ke gehra sitah-e-aab sa rishta,

Ghum-e-zindgi ke andheron may mahtab sa rishta,

Yaqeen ki jaden mazbut karta shadaab sa rishta,

Kamaal un rishton may nahi jo khoon ke hain,wahaan tou unsiyet laazmi hai..

Ek ajnabi dil may ghar kar jaane waale ajnabi ki zaat se rag-e-jaan ki tarha jud jaata hai jub koi….wahan kitne khubsurat jazbe janam lete hain..aadmi ki zaat ko, uske etmaad ko mehka jaate hain. Tahnaii ko saathi,derd ko araam,tadap ko dilasa ban kar milta hai Dost.

Besakunion ka daur maangta hai sakun….derd maangta hai rishta….ghum chahte hain qarar…tanhaii khulus ki bhuki hai..dil Dosti ka khwahan hai..ek aisa dost jo dost ki aankh,kaan,dil,zubaan ban jaaye…hatta ke shareek-e-ehsaas ban jaaye…milte hain aise bhi Dost,jub khuda bande ko apni mohabbat bakhshna chahta hai..tab unhi doston ke khulus may apni mohabbat ka izhaar karta hai..apne hone ka elaan karta hai..derd ko darmaan karke vo yehi tou samjhana chahta hai ke koii us se behter,khoobter Dost nahi hum bandon ka..aur hum hain ke saare jahaan may bhatakte hain…bhatakte hain dasht-o-sehra may..kyon bhatakte hain khud apne andheron may..shaur ki nhanni si kiran gar hum per ashkaar hojaaye tou saari hikmat samjh may aajaaye…

Tumhi Ho Meri Ibteda.............

Ehsaas

-------------

Ehsaas khuda ki amanat hain..

Ehsaas insaan hone ki zamanat hain…

Ehsaas na hon tou kisi bhi jazbe may koi husn nahi.

Ehsaas nah on tou kisi bhi rishte may koii pehlu-e-roghbat nahi.

Ehsaas hi ke dam se qayam hai insaan ki junnat..

Ehsaas hi tou raah-e-amal ke liye tayaar karte hain..

Ehsaas qudrat ka izhaar hain…

Ehsaas zindgi ka iqraar hain..

Ehsaas amal ke talabgaar hain..

Ehsaas ke dam se kaainaat ke manzar gul-o-gulzaar hain..

Gharz Ehsas na hon tou ye jahaan,jahaan waaley sab bekaar hain…..

Ehsaas aksar sahi waqt may insaan ko bedaar kartey hain...Ehsaas kabhi bade hi ajeeb rangon may milte hain..Admi jub apne aap se majbur ho kar koii qadam uthaane per jub tayyar hota hai,tab ye dil ka darwaza haule se khatkhataate hain..Aahista se halki si jharri bana kar jhaank lete hain..bas yehi ehsaas, ke uski humawaqt hum per nazar hai,qadam ko rok leta hai,zehan bedaar karta hai..tere faisley tere liye behter nahi hain…tu khud apna nahi hai..tu jis se wajud may aaya hai huma waqt usko teri fikr hai..jo tere haq may behter hai sirf usi ko khabar hai..so aye dil-e-muztar,zara teher,khayal kar ,uske khayaal ka,ehsaas ki tarha jo tere paas hai,jo saath hai ban kar tere sharf ka martaba , tu bas apna karam nibha..tu khud ko yaad rakh ke tujh may hai khuda…tere Ehsaas hi rahbar hain tere…tera rahbar tere saath hai…wahi denge tujhe teri manzil ka patta….

Ehsaas ka ek ankha safar,raah-e-ishq ki hai ibtida..

Ehsaas ki hi hai ye saahiri,majaz paaleta hai khuda…

Ehsaas ban kar hi tou milta hai zindgi ka muddua…

Her taraf ehsaas jalte hain kahin khanqa honk e charaghgaah…

Her dil ki hasrath kahe yehi ehsaas hi tou hain meri paanahgaah…

In hi ke sang meri ibtida…

Inhi se meri mohabbaton ki intihaa…

Be-Basi

Zindgi gar chund teherey huye palon ki kahaani hoti,Phir her kahaani suhaani hoti…Zindgi ka ehsaas tabhi hota hai jub khud ko zinda mehsus kare koii..Aur zinda hone ka ehsaas tabhi hota hai jub zindgi ki koi tahreek mahu-e-zindgi rakhe….warna mahu-e-khayaal ko zinda tassavur nahi kiya jaa sakta…khayaal khwaab ki dane hain..aur khwab hasrathon ka adhura safar taye kartey hain…bas wahin se ek kahani janam leti hai..ek dil jo zindgi jeena chahta ho jo uske dastaras may nahi..vo khwabon ke peeche chal padhta hai..un lamhon may apni arzu ji leta hai..

Log kehte hain khwab koshishon ka buniyaadi juz hote hain…jub tak khwab nahi hongey unhen pane ki jadojahad bhi nahi hogi..magar kuch khwab adhure hi khubsurat hote hain..kyonki vo aankhen jo adhure khwabon se hi mutmayeen hojaati hain vo jaanti hain apne khwabon ki haqeeqat…unki takmil ki khahish aur khwabon ke darmyaan ek haseen faseel khadi karke khud ko dayra-e-zabt may muhith kar lete hain.ye vo dil hain jo apni haden pehchaante hain.ye vo dil hain jo apna anjaam jante hain…ye vo dil hain jo apna inaam jaante hain…

Jahaan kisi ka khwabon may basera hota hai uska her daur sunehra hota hai…duniya-o-mafeha se bekhabar apne khwabon ki nazar hojaata hai…khwab haqeeqaton may dhalne lagte hain aur haqeeqaten khwaab si lagne lagti hain..waqt khwabon may simat kar apni chaal bhul jaata hai ..wahin unhi teherey huye palon may koi daastaan banney lagti hai…khwaab apni shiddat rakhte hain..haqeqaton ko khud may lapet lete hain..aur haqeeqaten faramosh kar di jaati hain..aur khwab junun may badalne lagte hain.

In Khwabon ki koi manzil nahi hoti..inki tabir ka koi khwaab nahi hota…ke vo dil jaante hain apni khahish ka anjaam….magar ek aisi duniya bana lete hain ye jahaan sab kuch unki arzu ka aks sa hota hai..aur ye deewangi nasha hojati hai…aur ye nasha zindgi ko shadaab karne lagta hai….vo nasha jo khayal se khwab tak ke safar ka haasil ho…derpaa nahi hota…jub tut-ta hai tou phir pairon tale zameen tak nahi chodta….dono suraton may khwab zakhmi hojaate hain…sisakte huye pal apni nadanion per khul kar ro bhi nahi paate….ansuvon ka bhi haq nahi hota…badi be-basi hoti hai..halaath,jazbaat ,sirf sadmaath may dhal kar reh jaate hain….

Nafsiyaati hamla hota hai un naazuk palon per jo teher kar bhi teher nahi paatey…vo hurf-e-ghalth ki tarha mitaa diye jaate hain un zehnon se jo apni safaii may kuch kehne ka mauqa haasil nahi kar paatey…apni safaii ke liye tayaar kurda daleelen khokli lagne lagti hain…kahaan ghalath hain hum…arzu gunaah nahi..khwaab jurm nahi…hasraton ki koi saza nahi…haan ye khud feramoshi ka hi kamaal hai..in sunnaton may,in khamosh palon may in be-hiss lamhon may….Kuch bhi tou apna nahi lagta..na khwab na haqeeqat…………..

Ek sitara qismat ka

Qismat ! aksar soii huii qismat apni taweel shab se uktaii huii ek subah ki muntazar hoti hai..ek aisi subah jis se aankh mila kar usko yaqeen hojaaye ke ye wahi hai jiska mujhe intizaar raha hai kub se…sadion saalon zamaanon se….ek khushaaind zindgi ka khwaab…her dil inhi khwaabon ka jawaab talaashta hua…apni qismat ki ore dekhe jaata hai…koshishon ki kamyaabi ka zaamin bhi qismat..mayus ujdi huii shaam ka dilaasa bhi qismat…ek be-shara ka sahaara bhi qismat…ek kaali shab ka sitaara hai qismat…ek saawaali dil ka naara hai qismat….ek ummid ek sahara hai qismat..kaatib ke haath jub qismat likhte honge tab in anginnat mukhtalif taqdeeron ke faislon per kitna roye honge kitna masrur huye honge najaane apne ahkaam bajaa laatey waqt ek lamhe ko bhi ye khayaal aaya ho, hikmat ne qismat ki samjh kitnon ko bakhshi hogi?…hakeemi, kareemi ki taraf maayel hone may jo waqfa lagaati hai wahin ruki tehri ek-tak dekhe jaati hai qismat…kitnon ki khahish hai ye ke agar kabhi ye mujhe il jaaye tou “puchenge apna haal teri be-basi se hum”

Tarranum ki taangen bus ke intizaar may shull hochuki theen…ye rozmara ka maamul tha..in laambi laambi linon may buson ka intizaar karna…aur un linon may usi ki tarha muntazar musafiron ke chehre padhna..aksar chehre kitaab hote hain…qismat apni lakeeron ka jaal unke chehron per hi bunn deti hai…tarranum ko apna aap un lakeeron may gum hota dekhaii deta…mai kahaan hun in lakeeron may…ye lakeeren abhi mujhse koson door hain…qismat abhi mere haal per meherbaan hai…ye saari kaali parchaaiyaan in gehri aankhon ki chilmanon taale chupaali hain..abhi mujh per qismat ki karwaton ka koi asar nahi hua hai….vo is bheed may khud ko gum na karsaki..bas unhen chupke se dekha karti aur socha karti” kaash Aye Maalik, mai tujhse sabki khushiyaan maang sakti…maangun bhi tou unki takmil ka waada talab karsakti…soch ki perwaaz bas yehin tak tou hai…khayaalon ka safar apni bulandiyaan taaye tou karleta hai…per aankh khulte hi jitni surrat ke saath paspaai ka saamna karta hai vo koi ehsaas baaqi rehne nahi deta…bas inhi sochon may ghaltaan line may aage badhti rahi.

Bus jaise hi dikhaii di sabke chere khil gaye…ab tou awaam-un-naas ke khidmat-gaaron ke khokle daawon may bhi koii dam nahi raha…bas voton ke haasil karne tak zubani naaron may simat kar reh gaii thi awaam ki qismat.. ab unki ankhon may koii ummid kal ki nahi…ke vo kal isi aaj ka hi janma hua hoga..aur saare shobon ki tarha transportation ka shoba bhi apni misaal aap tha..jub pura mulk hi beraahrawi ka shikaar hai tou mai kyon nahi….mujhe kya log dhoop may sukhen ya chal chal maren…so buson ka apne tayeshuda waqt per aana tauheen samjha jaane laga hai..aur log tou intizaar ke aadi hote hain…ek aur intizaar ye bhi sahi…ye afratafri roz ka maamul tha…badhawas pareshaan log apne hawason may kahaan hote hain….aur tarranum ki majburi ye thi ke is dhakam-dhakka bheed may khud ko bacha kar sawaar hona aur apni manzil tak pahunchna…

Tarrannum ne bachpan ka khubsurat chehra khud may mehfuz rakha tha ab tak…halaath tou soch per munhasar hote hain.insaan ka dil jis andaz se zindgi ko mehsus karna chahe…zindgi usey waise hi lagti hai..usey tou ye zindgi, sirf ek baar milne waali zindgi ,niyamat hi lagi…haseen…be-panaah khubsurat…her lamha jazbon se bharpur….her surat chahe jaane ke qaabil..aaj ka taqaza bhi manzur karna tha usey kal ki sherton ki tarha…uske jawaan hauslon ke saathi yehi tou they….vo khayaal jahaan hama-waqt ek sergoshi gunja karti…aas paas bikhre in chehron per,in be-jaan aankhon may,apni zindi phunk de…jahaan khushion ka besh-baha khazana Qaliq ne poshida rakh diya tha..zindgi yehi kehti rahi.. ye Duniya ek kasmakash hai..jo is se bach kar nikal gaya vo kahaan jiya…jo inhi se apni raah paa gaaya wahi ji gaya…bas vo bhi jiye jaarahi thi kasmaksh-e-zindgi ke her baab se kuch na kuch haasil karte huye….

Safar ko tou taye hona hota hai..vo kahan qismaton ka haal jaanne ki haisiyet rakhta hai..ek sitaara kub se tarranum ki qismat per rashk kiye jaaraha tha…aakhir is dil may khuda ne aisa kya rakh diya hai ..jo isey meri zarurat nahi hai…ye tou wahi hai jo usne adam ke seene may rakhi…ye wahi hai jo khud Rab ne apne liye moqadar ki…ye wahi hai jo isne apne bandon ko qismat ke iwaz inaayet ki…Mohabbat ko ibadaat banaa daala…aur khud mohabbat ban baitha…is se khubsurat khuda bande ki chahat kya hosakti hai..

Tarrannum zindgi ke her moqam per khush-o-khurram dikhaii di..usne apni zindgi aas paas bikhre her rishte ke labon per saja daali..vo rishte jo bas bantey chale gaye vo samete chali gaii….unka silsila ab tak jaari hai…jaari rahega….Insha Allah...